森美、小儀《流星級的演唱會》製作過逐瓣講

改名+選角

當定o左主題之後,我o地就開始改名同搵人。改名o既o野,你知啦,最怕改壞名嘛!其實講到底個劇名最緊要夠吸引。好似〈流星級的演唱會〉,呢個名真係諗到嘔血o架!而選角方面,我o地都好嚴謹o架!最緊要Match到個主題。今次o既主題擺明係同演唱會兼音樂有關,所以我o地搵o左Swing助我o地一臂之力,佢o地仲會用人聲扮演樂器聲,好似鼓同其他敲擊樂器咁。我o地仲請o左兩位唱得之人古巨基同盧巧音做特別嘉賓。而o伙個節目入面,我o地同Swing係一隊組合,叫「冬音宮」。呢個咁有型o既隊名,係由堪輿學家楊天命幫我o地改o既,佢詔我o地四個都係冬天出世,呢個Show又同音樂有關,所以改o左「冬音宮」呢個名,係咪好掂呢?

度橋+環節

每次做Show,事前都要做足準備功夫。好似今次我o地分成6、7Part,每Part都有唔同o既特色。呢次〈流星級的演唱會〉入面,我o地就加插o左默劇同Talk Show。而當中o既笑位同o的橋,好多都係o係日常生活得返o黎o既Idea;又或者平日同朋友傾偈,有乜好笑o野都記入腦,要用o既時候,佢就會自動彈出o黎。呢o的都可以算係度橋o既竅門。好似今次呢個Show其中有一Part,係因為我o地平日睇得演唱會多,知道個唱o既例牌菜實有升降台,所以我o地今次都會有「人肉升降台」。人肉點升降?入場睇咪知囉!