交換星級體驗
能夠同天王級歌手合作,贏得口碑之餘,更賺o黎榮譽獎項,究竟呢兩位音樂人同天王o既合作關係係點呢?先聽聽佢o地交換一下體驗。
E:Eric Kwok (郭偉亮) J:Jone(徐繼宗)
E:講到作曲,其實自己每年都會keep住作廿首左右,都好少為Artist度身訂做,自己鍾意寫咩就寫咩,佢o地o岩就會要,唔計賣o左o既200幾首,而家屋企儲儲埋埋都有成80隻,如果有人想搵某類歌o既,我就會o係存貨裏面搵俾佢o地揀。
J:我就同你o岩o岩相反,我比較鍾意為歌手度身訂做,因為大概知道歌手o既長處o係邊之後,你就可以狂谷佢o既好處,收埋佢o既缺點,我覺得幾好玩o架!好似似我寫華仔o既〈繼續談情〉,本來寫o既時候冇俾佢,但後來加o左段粵曲之後,我就覺得係非華仔莫屬。佢第一次聽已經好鍾意,重即刻要o左,所以華仔可以話係同我合作得最多o既歌手。
E:咁同我合作得最多o既歌手,就一定係Eason喇!我同佢真係好夾,性格似啦,食o野似啦,著衫又鍾意闊身板仔o野,大家又係好情緒化o既人,係我冇咁多o野講o者!佢o既音域闊度好大,我覺得自己幾好彩o架,〈夕陽無限好〉係Eason回歸樂壇後第一首plug o既歌,查實任何一首Eason o既歌都一定會hit,之前真係冇諗過會咁受歡迎。首歌係我之前睇電視劇《飛越18層》時聽到一句「夕陽無限好,只是近黃昏」感動到我而寫o既,連個demo都只係得呢句歌詞咋!
J:你就好啦,講真,我都好想同Eason合作o架,希望o黎緊有機會啦!
E:同Eason合作真係好開心,o係佢就o黎出o既新碟入面,我同佢以及Jerald o係創作時真係笑個不停,做碟應該就係咁,所以大家一定會發現今次o既Eason會好鬼佬o架,我o地重特登去o左加拿大錄個喇叭聲添,冇香港歌手咁做過。
好想做幕前
幕前、幕後都玩過,呢兩位曾經出過唱片o既音樂人,都有鋪癮想唱番歌o架!
J:我真係好佩服你o架!可以做到pop之餘,又有自己o既風格,重可以 攞到個平衡位,做作曲人呢條路一開始真係好難行,要識點攞到個平衡,能夠K歌之餘,又要有o的新o野。
E:我都有過挫折o架!就算入行耐同埋做到有名,都會有人唔要你o既歌,我都慣哂o架喇!首歌冇人要唔代表佢唔好,好多時只係機緣,timing唔o岩!我都好鍾意你寫歌o既風格,而呢類風格就係我自己好少寫o既。
J:哈哈...多謝!你o黎緊有乜搞作呀?
E:今年除o左會繼續寫歌之外,我重會出個人大碟,又幫Eason同Grace(葉佩雯)籌備新碟,做o的佢o地以前未做過o既o野。有時真係好奇怪,做做下幕前就想轉幕後;做幕後做到咁上下,又會想做番幕前。難得有得出碟梗係出啦。其實幕前同幕後係兩個世界,幕後可以free o的,鍾意做咩都得,而幕前就要好固體咁做事,而家我要o係兩者之間搵番個平衡。不過,如果要我揀幕前同幕後o既話,我就鍾意做幕後多o的,我重會視作曲為我終身職業添!
[右圖1]Eric Kwok同Jerald組成Swing殺入樂壇,拆夥確實係樂壇o既損失,好彩,o黎緊佢o地會再攜手造好歌,o係幕後為其他歌手獻力。
[右圖2]早前o係Eric Kwok o既音樂會上,難得與女友葉佩雯同台合唱,令Eric甜在心頭。