鬧Grace搞到掟Headphone
L:其實我呢張碟同好多音樂人合作過,合作o既過程我學到好多o野,可以幫我跳出唱作o既框框。我想問你,你成日話作曲靈感,我都知好抽象,但係寫唔出歌點算呢?
E:冇o架!休息囉!或者做相反o既事,作開快歌走去作慢歌咁,Fresh o下個腦o丫麻!
L:我都遇過呀,我試過因為作唔到曲而暫停唔彈琴一個月呀!
E:或者換o下樂器都得喎。
L:咁做Producer呢?做自己女友o既Producer係唔係好難呀?
E:其實都唔係咁難o者,呢o的叫做一物治一物。其實我都好大壓力,因為佢係復出,所以算係好大件事。我o地的確有吵鬧,有時同佢講同一樣o既o野講20次都Get唔到,有次搞到佢仲嬲到掟個Headphone落地。不過,我同佢嘈都係為佢好呀,因為佢係唱Punk
Rock,要有火先得o既!
L:哈哈哈!我咪就話一定會咁囉,幫女友做Producer,呢個就係好玩o既地方!
E:我做其他歌手要鼓勵佢o地,但係做佢呢就唔使lum佢,可以直接鬧佢,但係都係因為我錫佢o者。
搞喊大男人
L:我o岩o岩做完演唱會,你有咩感覺呀?
E:咪就係你喊我就喊囉!我記得開頭蘇永康對你講o既真情對話,我已經覺得好感動,睇你演唱會就係想睇你講深情對話,;到最後你彈最後一首歌之前,你講o個番說話,我忍唔住喊,我喊喊o下望一望我隔離o個位,佢喊到好似瀑布咁添呀!我平時好少喊,睇戲都好少,但係你一講o的深情o野,就搞喊我喇!
L:我之前冇諗過會o係呢個Ending位講o野,不過o係o個一剎那,我突然心血來潮先講,所以真係好自然o既深情對話。
E:o岩呀!就係要呢o的。我記得你自彈自唱時個咪一直係咁跌,我見冇人o係你身邊,我差o的跑上台幫你喇!
L:哈哈哈,真係好無助呀o個陣。俾著以前o既我,一定發脾氣,但係今次我一o的事都冇呀,反而識得自嘲添!我記得以前參加新秀,我第一次自彈自唱完全錯哂,我返到屋企發脾氣,一隻鞋掟爛塊落地玻璃。
E:哈哈,你成日打爛玻璃,不過你而家EQ高o左好多。