偶像合作勁失眠
Eric被真係自作孽,因為係佢自己度橋o係MV入面做鬼。劇情係講Eric搭"車立"時,見到好多好多朋友行出行入,可惜,佢o地都見唔到自己,最後先知道自己原來死o左變鬼。
Eric重邀請大眾眼中佢o既「好朋友」Grace同兄弟霆鋒客串,更難得請埋偶像曾江。原來Eric被早年電視劇《射鵰英雄傳》飾演東邪o既曾江迷住,翻煲《射》十幾次,Eric笑言今次夢想成真:「 冇諗過真係請到佢o黎,真係夢想成真!我重特登帶o左套DVD o黎俾佢簽名。呢個MV對我係一份寶貴o既禮物,幾個對我重要o既人都有份參與。」
Grace就大爆Eric失眠o左好幾日。
Eric:「真係好緊張o架,因為個MV真係一Shot過,入位o既時間都要度得好準確。不過唔怕,曾江咁好戲,佢同霆鋒頭先綵排時,真係交呎戲,好自然。」
反而會玩改編歌
Eric平時為Grace監製多,度MV就係第1次,所以都有反問MV迷o既Grace攞意見。Eric話〈晏〉係自己o既作品,搵o黎林夕填詞。「首歌講男女間拍拖好易離合,其實拍拖,拍就真係要『拖』,兩個人之間要多o的包容對方、寬容對方,咁先可以長久。」
今年12月就會推出個人第2張大碟,簽o左新公司o既Eric亦會嘗試多元化音樂。「平時主要幫其他人監製音樂,所以自然o既大碟會有改編自日本、意大利等o既歌曲,又會玩下Punk Rock。」
網友求Swing復出!
「聽o左幾好聽,如果佢出碟我一定買,好想Swing出o黎唱番歌......」(www.discuss.com.hk)網友o係討論區勁讚Eric首新歌〈晏〉搶耳,重非常期待佢o既新碟添!
其實由組合Swing到而家獨立發展,Eric o既歌都好多樂迷追捧,好多網友話想Swing重組出番o黎唱歌添!
孖Grace情侶過檔
Eric自04年12月後約滿英皇後,一直自由身主力做幕後工作。最近就簽約Silly Thing,同女友Grace做唱作歌手。不過Eric否認今次o既決定同女友有關,唱片公司亦表示2人暫時都未有幕前合作o既機會,Eric只係會為對方擔任幕後o既工作。