〈晏〉網上熱放Eric Kwok慘被Eason搶功

最近我網上痕去討論區,勁多人讚陳奕迅首〈晏〉好聽,重不斷渴求呢首新歌。

錯哂!其實〈晏〉並唔係Eason唱o架,係Eric Kwok先真!正因為有呢個誤會,好多樂迷即時留言澄清,重話Eric Kwok唱得好有風格,換轉係Eason未必有同一個效果啦!今次冇被Eason搶功,好彩有網友撐咋!

激似〈夕陽無限好〉?

〈晏〉一派台已被外間以為係Eason新歌,重被誤以為係〈夕陽無限好〉o既下集,曲風似、Eason腔,就連歌詞都同〈夕〉一樣講要珍惜現在。呢個誤會重傳到Eric Kwok耳中添!

Eric Kwok:「我都聽人講過話好似Eason,咁都未必係壞事。我都好鍾意呢首歌,歌詞係我同林夕傾過後先寫o既,講情侶間易合易離,兩個人相處應該多包容對方,先可以繼續拍『拖』落去。」

查實Eric Kwok同Eason合作無間,〈夕〉都係由Eric Kwok作曲,同樣都係林夕填詞,風格上相似都可以理解,音樂好聽就夠哂啦!

12月終於出新碟

Eric Kwok早前都係主要幫其他歌手如Eason等做監製,終於再從幕後跳番上幕前,不知幾多網友要慶祝。下月就會推出佢個人大碟,非常有意義,因為係佢加入新唱片公司後首張個人大碟,對上一張已經係前兩年o既新歌加精選,新碟非常多元化,會將佢想玩o既音樂放落去,當中就有外語o既改編歌,又會玩Punk Rock等曲風。

早幾年當Swing拆夥o個陣,好多樂迷覺得好可惜,不時o係網上留言想佢地重組出碟添。不過,fans又話,即使係Eric Kwok單拖出碟都一樣咁支持喎!