與Eric Kwok戀情穩定，又不用捱更抵夜，葉佩雯身型一度暴脹，更因此惹來懷孕疑雲，這些「輿論」亦成為葉佩雯的減肥推動力
I Have A Dream 葉佩雯
做人應該有夢想，要圓夢便要有付出，就像夢想中六合彩獨得六千萬，都要拎五蚊出o黎落注，連五蚊也不想付出，夢想只是一種幻想。
葉佩雯，99年簽約英皇娛樂而成為第一代小花，雖未至於要風得風，但也曾經在樂壇佔一席位。事業泊到好碼頭，連愛情一樣搵到頭好人家，早在英皇時期已秘密與著名音樂人郭偉亮(Eric Kwok)撻著,而且維繫至今。
愛情生活叫人羨慕，但表面風光的事業卻叫葉佩雯吃不消。在樂壇兩年光景，扮小花、跳勁舞雖然受歡迎，卻同時發現跟自己的音樂夢想愈走愈遠，終於有日發覺頂唔順，毅然與唱片公司解約，退出樂壇，只要齋食鹹魚白菜也好好味的愛情。當時不少報道都指葉佩雯有了個大靠山，可以「un un腳」做郭家少奶奶，但原來葉佩雯一直都沒有放棄過自己的夢，闊別樂壇五年，肥過瘦過、又試過變身做購物狂，但夢還是一樣，夢想自己鍾情的樂與怒可以在香港樂壇佔一席位，靜極思動後，決定再戰樂壇，目的就是要話俾人知，葉佩雯不是一個少奶奶!就算係，都要係一個勁度十足的少奶奶!
戀愛大過天
多年來傳媒提到葉佩雯，焦點絕大部分都是與Eric Kwok的戀情，就連當時葉佩雯與唱片公司解約，都有傳因為她泊到個好碼頭，不用再在樂壇打滾，安心在家做郭家少奶奶，但原來葉佩雯對「少奶奶」這三個字非常不滿意，而且覺得噁心。「當時好多人都以為我冇做o野,其實我仍然有拍戲，只不過冇乜人留意。我知道當時好多報道話我，一時又話我有個好碼頭唔使做，一時又話我有o左BB唔使做。首先我要講係我o地財政一向都獨立，我自己有錢唔使靠佢養，二來係你估佢(指Eric)真係有幾十萬未開頭?或者佢細個時可以咁講，但佢o依家出o黎做o野,所有o野都係佢自己一手一腳賺番o黎。
成日都話我過少奶奶生活，我真係覺得好噁心，我o依家先至得26歲，我唔想咁快做少奶奶。其實04年佢俾人影到同第二個女仔一齊，我覺得唔係乜o野大事，我又唔係第一次拍拖，我反而覺得咁樣先至可以維持到一段戀情。呢件事之後，我o地感情反而好o左,一直以來我都唔信有一件事係十全十美，尤其係感情，要有齊甜酸苦辣先至叫做愛情，如果有一對情侶可以一直都唔會有事發生，你諗o下有幾恐怖，亦說明呢段戀情經唔起風浪，萬一真係有事發生，就一定會分手收場。所以當時佢雖然曾經受過外間引誘，但未嘗唔係一件好事，至少我o地之後相處反而好o左。「其實自從同Eric公開o左之後，我覺得輕鬆o左,其實當時我都明白公司點解會擔心戀情公開會有影響，記得當時同佢公開o左之後，我起碼唔見o左一半fans，不過我冇介意過亦都預o左,我覺得如果佢o地因為我拍拖而離棄我，我都冇辦法。我係一個藝人，但亦係一個普通人，我都需要愛，其實o依家都幾好，至少我同佢出街唔使遮遮掩掩，又唔使驚俾狗仔隊跟。」
結婚又如何
根據英皇不成文的「小花條例」，葉佩雯同樣在單親家庭成長，但與其他小花不同，葉佩雯父母不是離異收場，而是父親在她兩歲時因交通意外而身亡。雖然葉佩雯沒有經歷過父母感情生變而離異的情形，不過葉佩雯坦言希望有自己的家、有自己的孩子，但卻沒有想過結婚這回事。「唔知點解，由細到大都幾抗拒結婚，兩個人一齊最重要係開心，我成日都會諗，係咪搵個證婚人,o係張紙上面簽個名，兩個就會生活得開心o的?但我又真係唔覺，身邊有朋友試過離婚，但又有好多年紀差唔多o既朋友，個個都話想結婚，又話女人一生人點都要結一次婚，點解呢?我真係唔覺得囉!可能我知我脾氣真係唔好，如果我真係結婚的話，我諗我都離過好多次婚……哈，所以我同佢(Eric)都有o左共識，應該會有一段長時間我o地唔會有結婚o既衝動。
「不過有時我又會諗，婚我唔一定會結o既,不過我又想有自己o既,小朋友，咁小朋友張出世紙點算?(記者告訴她有人認頭就得),乜唔使show結婚證書咩?)唔使，就算唔填都得，不過會變o左私生子)咁又唔得，不過只要唔使show結婚證書已經好好!就算有一日結婚，我諗我都唔會太鋪張，結婚始終係兩個人o既事，咁同屋企最close o既人食餐飯咪夠囉!「我試過人o地結婚擺酒請飲，去一次驚一次，真係好怕擺酒，覺得好麻煩，剩係事前準備功夫已經夠你煩幾個月，最『娘』係周圍同人敬酒，諗起都怕怕!」
與Eric Kwok戀情穩定，又不用捱更抵夜，葉佩雯身型一度暴脹，更因此惹來懷孕疑雲，這些「輿論」亦成為葉佩雯的減肥推動力