七年風流

由Eric Kwok與Jerald組成的Swing，叫過做Snowman，是比Shine、艾粒更早的boy band。 7年前因Jerald一句而分手，今日復合又係因為佢。一個以《武當》新大碟之名復合，兩個大監製組隊，本地可一不可再。

02年時，Jerald自覺一身好武功，奈何Swing闖蕩樂壇以來，一直叫好不叫座，決定歸隱，與英皇提前解約，Swing暫別，是上一回的故事。

到今年頭，Eric Kwok走出閉關日打夜打的《魔獸世界》，推出個人大碟《LEET COLLECTION》，相比起去年寫給謝安琪 hit爆的〈囍帖街〉，成績始終比下去，猶記得當時訪問，Eric說:「Jerald唔似我咁 pop，又怕o左做幕前，會介意成績未能如意，Swing未必可以重來。」

但今天......究竟是甚麼回事?Jerald:「是我打給 Eric的，記得已經係夜晚兩點。合約上面寫解約後7年唔可以同其他公司做幕前工作，屈指一計,o岩o岩夠，不如再玩。」

冇期望

分手係佢，復合又係佢，只因今次Jerald做好「大不了一走了之」的準備，「出番o黎最大分別係冇期望，好o既話會搵多o的儲老婆本，唔好o既話兩年後去加拿大結婚生活。」

分手期間，Eric幫 Eason、Kay、祖兒，Jerald又幫 Juno、劉美君做監製，曾經又一齊做Eason《Life Continues》EP，Eric:「以前 Swing一人作一o的歌，有時淨係hit我o既〈 1984〉，有時hit佢o既〈半張飛〉，會令對方唔舒服。我o地今次做message tee，要兩個一齊睇先知咩意思，其中一件係我印〈 1984〉，佢印『I hate this song』。」Jerald:「事實上真係唱得太多次啦。」

第3成員陳子聰?

但估唔到，原來Swing前身Snowman開始時本來有3個人。Eric:「我o地兩個相遇o係唱片公司，係一個前輩介紹我o地識，起初見佢好寸，但後來一傾音樂就不得了，始終大家都o係外國返來，當時公司仲想加多個澳洲返來的陳子聰，負責幕前，但後來佢話要留o係o個邊唔知搞乜所以告吹。」

新大碟取名《武當》亦係似ABC亂揀漢字， Eric:「我o地鍾意武字同當字走埋一齊,o個種『勁』!我o地以前仲好鍾意睇黃日華做o既《射鵰英雄傳》，所以今次MV好榮幸搵到佢同劉丹客串番郭靖同北丐。」

Jerald就戴頭套做南帝，除o左真係吊威o也飛o黎飛去，〈 Let it Go〉一曲仲打到除頭套!Jerald:「雖然個 MV同首歌冇關!哈哈!」

我有貨

猶記得Swing解散時最後一曲〈大大公司〉，講一間公司執笠仍然以禮待人，今次有新曲〈我有貨〉回應，講做股民心態，要信自己唔使一跌就沽。奇在Eric唔多儲錢未買樓唔多投資，點會揀呢個topic?原來係Jerald，最後佢講到唔捨得走，推介隻2823、A50中國基金。難怪係佢可以話分手就分手。

Swing Profile

陳哲廬(Jerald)
背景:父親是香港著名作曲家陳永良，後隨父親移民加拿大，回港後曾同父親一樣亦為劉美君作演唱會監製。
音樂偶像:Sting
最愛電影:《 Die Hard》、《 Back to Future》
新歌最愛:〈魚蝦蟹〉─「講個海愈o黎愈少魚，靈感來自睇完紀錄片《 The End of the Line》， 30年後大海可能再冇魚，因為俾我o地食晒。」

郭偉亮(Eric)
背景:香港出生，小時候父親是律師， 15歲到美國留學，修讀傳理系，回港後成華納作曲人。
音樂偶像:Quincy Jones
最愛電影:《月黑風高》、《 Groundhog Day》
新歌最愛:〈 Let it go〉─「第一首一齊再作o既歌，因為鍾意個名，叫成日覺得懷才不遇、容易妒忌、執著o既人放開o的。」