Swing結業清算
當日本百貨公司尚未進佔本地市場前,旺角的大大百貨公司是筆者童年時之假日蒲點,永難忘其執笠前大割價的墟冚人潮,Swing經營的《大大公司》最近宣佈光榮結業,也許真正愛音樂的,作自己作品總有一份執著,兩位老闆Eric及Jerald沒有打算賤賣套現;反而挑選了合作三年期間,四件值得永誌記念的非賣品。
Swing難忘四部曲
Snowman是Swing的前身,在2000年轉簽新唱片公司後,雪人被融化改名Swing;可惜搖擺近兩年後,二人近日推出的新曲+精選大碟《Swing Swang Swung》己成最終回。Swing將解體變成過凡式Swang;但合作期間所經歷的,總會光影留痕,製作Snowman首張同名大碟時,更為二人帶來最多難忘片段。
十蚊起隊名
想改一個好名,一般人會找算命佬幫手;但兩人性格好玩,竟將此責成交予一名街上乞兒。在苦思三個多月後,仍未能定出組合名字,剩下二揀一:Buzz或Snowman。二人忽萌怪念,走到尖沙咀隨手找一個乞兒,將一個十蚊銀交予後者擲毫決定。乞兒向天一擲,最後公仔頭一面將組合定名為Snowman。Eric憶述當時情況:「只係轉身打電話俾唱片公司知我o地o既決定,前後唔夠兩分鐘,一轉頭個乞兒就消失o左,都唔知佢係鬼定神仙。」