技安
這是一個聽K歌寫K歌、絕不曲高和寡的地道香港仔，不過比較有米。郭偉亮父親為律師，與楊受成為多年老友，當年他入英皇，就是父親穿針引線。他自小住渣甸山，家有司機與三個菲傭。小學與中學讀聖保羅男女校，也學過小提琴。中一時因父親豪賭欠債，他與母親及弟弟移民美國避債，少爺仔才變平民。
細個幾曳，蝦蝦霸霸，是個典型的技安。未識作歌已識作o野,經常講大話，又冒家長簽名，不過次次穿煲。小學三年班已經識講鹹濕笑話，講到老師都笑，不過依然要罰企。我生得高，通常坐最後。有個Miss好大胸，我就偷偷畫佢，畫o左四個胸出o黎。身邊同學笑到噴鼻涕，Miss發現，無出聲就走o左去。我估佢應該唔會嬲，因為佢成日緊身衫show off身材......
過到美國，屋企無錢，轉變好大，我變了自閉仔。無朋友，經常躲在房彈琴，跟著就開始作曲。美國那邊的中學生水平好低，我中一過去，數學已經超班，反而開始俾心機讀書。細佬細我兩年，完全當了自己是美國人，現留在那邊發展。我的好朋友都在香港，一直好掛住。以前不愛看娛樂新聞，過到美國反而日日煲劇，勁歌金榜個個星期追。那時興四大天王，他們唱的歌，我覺得自己都作到......其實我無乜抱負，只希望快些儲到錢買樓。
俾我唱就好喇
郭偉亮說，買到樓，就結婚。不經不覺，跟葉佩雯已走過九年光景。「最初一齊時，唔可以俾公司知，拍拖要偷偷摸摸。每次出o黎,大家要扮到好唔熟，但眼神又好有o野,好似進行恐怖活動咁，不過好心甜。」想當年，葉佩雯可是英皇力捧三小花，與何嘉莉容祖兒齊名。郭偉亮出面，葉佩雯才得以順利和英皇解約。「我成日叫佢出番o黎唱歌，始終咁後生。但佢運氣真係麻麻。」
上次葉佩雯出碟，郭偉亮負責監製。「對待自己女朋友，會無咁包容，錄歌時成日鬧交。好彩張碟走rock路線，好需要火,o的火真係出晒o黎。」成功感不下於監製陳奕迅謝安琪。只可惜，葉佩雯那次成績毀譽參半。
「其實佢不嬲鍾意rock，之前去日本跟小室哲哉學藝，都諗住行呢條路。最唔忿氣，係俾人話佢『扮rock』!」郭偉亮真的忿忿不平。「零九年Grace會再出碟，今次我絕對唔擔心，有恭碩良同我幫佢寫歌，應該一定得......」明明是郭偉亮訪問，變了宣傳葉佩雯。
不過，我最想知，是〈囍帖街〉給了謝安琪，葉佩雯有無羨慕，或詐型?「佢有講過:『假如俾我唱就好喇!』我就話:『首歌唔o岩你呀』其實，我真係好想將自己o的運氣分o的俾Grace。」未買到樓，這應該是暫時最好的情人節禮物。