Eric:「冇特別感覺」
「結束Swing有乜感覺?其實冇乜特別喎,同我o地每一次出o黎做o野冇乜分別,因為我o地每次都當係最後一次。Snowman o既時候令我o地覺得好多o野都唔可以保留,可能今次做o左就冇下次咁,所以我o地上親乜節目呀、影親乜相都係癲癲肺肺咁,因為我o地每一次都會盡情享受。」
「Swing以來最可惜、最失望o既事係知道Jerald唔做,因為我知道重可以玩多一排o既最開心就係『叱o宅』喇,因為呢個獎真係自己一手一腳努力得返o黎,我o地又唔係靠乜宣傳,只係靠音樂。」
「咁快結束係有可惜,我都重有好多o野想做但係應該冇機會再做到,但亦都唔係一件唔好o既事,學Jerald話齋,o係最高峰o個度收未必係唔好o既事,同埋冇乜人做到,我o地話唔玩唔玩,唔會再出返o黎,就算係都會係30年以後o既事,到時我o地個仔都出o左世喇。」
「我覺得我o地今次唔玩同市道唔好o既關係唔係咁直接,因為我o地o的碟唔係話好賣得仁得,但係又唔係唔賣得o個種,一向都好平穩o既,我o地有固定o既人聽我o地o的碟,尤其是攞完『叱o宅』個獎之後,我諗我o地可以出幾隻碟,但係我o地一定冇Twins佢o地咁紅囉,因為我o地始終都唔係偶像派。」
「公司聽到我o地呢個決定之後都好愕然,尤其是Music Plus經理人方面,我諗佢o地都好失望。但係我o地決定走,佢o地都好尊重Jerald o既意思,因為佢o地都知Jerald真係幾辛苦下。」
「之後我會專注做幕後,幫人監製、編曲、作曲咁,自己都幾鍾意做呢樣o野。我覺得Swing完結o左之後俾到更多空間同時間我去專心做,因為做幕後真係俾到我好多錢,同埋同唔同artist合作都可以做到o的新o野,擦得出火花,我好鍾意。」
「我同Jerald o既感情非常之似一對兄弟,兄弟經常會有摩擦,見面做o野會覺得對方好煩,冇乜大鑊o野都唔會見面,就好似真正兄弟咁平時住埋會頂唔順大家,但係分開o左就會珍惜,我諗我o地o既感情就係去到呢個地步。」
「今次分開開同我o地o既感情冇任何關係,因為佢真係太頂唔住呢行,太辛苦。」
後記:最後一次訪問
Swing雖然未必係小記最愛o既組合,但係一直好欣賞佢o地對音樂o既熱誠、堅持,知道佢o地解散都為佢o地惋惜。今次相信會係小記最後一次訪問Swing,臨別在即,未有刻意的依依不捨的Swing如常嘻嘻哈哈,但我知道,佢o地心中始終有點離別愁緒,只是冇表現出來而已,話哂都係男人大丈夫嘛!