屎忽痕
對於「復合」，Eric已經見怪不怪，因為02年至09年間，Jerald提出過3次復合，是以他已經沒有太大感覺，因為他太了解Jerald，「佢呢個人反覆得好犀利，今日可以好熱誠咁打個電俾你，夜麻麻講到天花龍鳳，隔日就『我諗過都係唔好啦』。所以每次聽完電話，都係等緊下一個電話，佢最尾o個次打o黎同我講話復合啦，搵到張contract啦!」頭兩次復合，Jerald自認「屎忽痕」，第三次最認真，連唱片公司高層也找出來談，談得七七八八，但最後還是拉倒，「因為我有個條件，就係一個宣傳都唔做，Eric做哂，o個時連橋都諗埋，拎個Jerald紙板公仔出o黎，但對方都係話唔得，咁就算數囉。」Jerald不喜歡拍照，不喜歡「artist」的身份，第一次拆夥，亦是因為這些原因，「第一，我唔識擺甫士，o的相唔會好睇，第二，我係想promote自己音樂，有時影o左成個晏晝，到頭來一係唔出、一係得一角，唔好o徙我心機!」
第一次拆夥，Eric最不開心，亦不願意，因為他覺得最難捱的時候已經捱過，當時剛開始成功、入屋，是收割的時候，但他沒有挽留。「如果佢唔想玩就冇意思，無謂迫佢，只不過覺得可惜。」其實解散前，二人已經去到「面左左」的地步，因為唱片公司經常會選Eric作的歌去plug，Eric直認這是決裂的其中一個原因，「我作o既歌比較pop，佢就好鬼佬，其實應該話Swing o既靈魂係Jerald比較重，但係唱片公司好多時係揀o的比較safe o既歌。」
這樣一來，令Jerald開始懷疑自己在樂隊中的重要性，甚至懷疑自己的能力，「我可以被替代，佢可以拍任何一個人都做到Swing，覺得自己冇乜價值，信心受到好大打擊，當時幾depressed，搞到我同太太關係都唔係幾好，係事業上o既低潮。」
太天真太傻
二人在音樂路上，看似是南轅北轍，但剛加入樂壇時，其實是目標一致，Jerald還記得Eric的CV第一欄寫著:「To gain maximum exposure in the Hong Kong music industry」，「我好記得呢一句，心諗:『正呀!同我vision一樣。』」他們想改變樂壇，但八年前已經知道沒有可能，Jerald說:「覺得自己太天真、好傻，改咩變樂壇o者!」Eric說:「我可以話俾你聽個樂壇係改變中，但唔關我o地事，今時今日o的碟賣到咁差，係唔關我o地事，哈哈哈。」