Swing我唔玩

可能,你睇完年初《叱o宅頒獎禮》,先知Swing呢隊組合唔係浪得虛名(叱o宅組合金獎!)。

但係,Swing同小記講:「有次搭的士,個司機讚我o地o的歌幾好聽,我話:『係呀!係呀!咁你有冇買碟呀?』佢定一定先答:『 哦......未買呀,不過諗住買!』現實就係咁囉!」係o既,其實係唔係浪得虛名可能唔太重要,無飯開先係重點!

所以,Swing選擇結業, 唔同你玩!

你諗你 我諗我

Swing o既Eric同Jerald由組成「Snowman」開始,拍檔四年。一向諗法唔同,鍾意互窒,唔會扮friend(不過事實係friend o黎!), 一睇就知。

Jerald:「我o係一年前已經諗緊再玩多幾耐,做到年尾覺得唔係辦法。現實生活真係無飯開,搵唔到食!我年紀又唔係十八廿二,要發明星夢都發夠啦!所以決定要走,寧願轉做Management o既o野!」

Eric:「我唔係咁睇,其實我好有信心!如果真係搵到飯食,我覺得依家先係開始。不過,如果Jerald做到咁憎音樂,咁唔開心,我寧願唔做,俾佢 keep番o的興趣!咁我做幕後都搵到錢o既。」

〈Shut up〉+〈大大公司〉=至愛

Eric:「出道以o黎,唱o左咁多首歌,我覺得〈Shut Up〉好正,真係好正,唱法好特別,係好Swingo既o野。〈1984〉唔係唔好,不過真係大路,你俾學友都唱到。」
Jerald:「我就好記得〈大大公司〉呢首歌,因為我阿媽好鍾意,佢平時唔聽中文歌,但係都讚呢首歌好聽!係比較驕傲o的o既一首歌。」

Eric:「但係,Jerald,我真係好想同你拍齣戲,做一o的好以前o既武俠片,你黐鬚個樣一定好搞笑!」
Jerald:「哈哈!我都想o架!不過,其實我o係呢個圈都無乜特別想做,四年都做到自己想要o既音樂,有人幫你出碟,重想點呀!」

後記:繼續玩?

訪問尾聲,大傾閒偈。Eric突然好緊張同Jerald講:「如果我o地繼續玩,唔拆夥,今年「組合金獎」都應該係我o地攞!」大家當堂精神一振,笑晒!但係傾多兩句,又講番「搵唔到食」呢個老問題,無奈!

亂世兒女,搵食艱難,願各位與Swing共勉!