99年合組Snowman、2000改名Swing唱紅〈 1984〉、11年舉行告別演唱會，拍擋Jerald不如Eric Kwok看得透，一早放棄香港歌手夢。
我唔係麥浚龍
邊個係Eric Kwok?Eric Kwok說，十三歲前，自己是技安，蝦蝦霸霸有錢大晒。十三歲後，二千四呎豪宅沒了、三個工人一個司機也沒了、大律師父親淪為債仔通緝犯，也就再沒辦法蝦蝦霸霸做技安。也全靠那場家庭巨變，讓他"足否"在家學會作曲這個免費娛樂。細個錢唔係我屋企最多，讀聖保羅人人都有錢。但係論曳、論衰格，肯定我第一。成日口賤賤、玩人蝦人、講鹹濕笑話，試過掉個矮仔落廁格馬桶，又試過上堂笑個大胸Miss，畫到人o地有四個胸。我由一年班曳到六年班，一直曳到十三歲移民。
講好聽o的係移民，唔好聽其實係走佬，老豆欠o左大筆賭債又犯o左法,o係香港俾人通緝。阿媽於是帶我同細佬去加州，租o左個六百幾呎o既 apartment住，工人、司機梗係乜都冇啦，門壞o左、油漆甩o左自己搞、連細佬屙屎塞o左馬桶、全屋浸晒屎水都係我去通去洗。 但係我愈有錢愈衰格，就反而o係o個段時間，學到最多o野,學識點照顧自己點照顧阿媽細佬，學識點做人。仲學識埋寫歌，既可以發洩，又可以用o黎做搵食工具。不過搵極都唔夠買架R8，因為我唔係Juno o丫嘛!
老豆少來往，十個月前佢生cancer，四個月前o係美國過身。睇住佢o係病床度咁痛苦，我知，死，對佢o黎講係解脫。我問過師傅，知佢o依家o係天堂同地獄之間，等緊審判。佢應該去邊，我唔係神唔識審判，但係我知佢對我o既影響。佢犯過o既錯，畀我睇到唔好再犯;佢好多女人，對阿媽唔好，我學識要錫阿媽、錫老婆。 我以前唔明遊戲規則時，好想去到個巔峰，當我明白規則、明白呢個圈時，老老實實，已經唔想擺咁多時間追求o個個所謂巔峰。呢樣o野,亦唔多唔少係老豆影響我，做人真係要經歷過痛苦，先至知咩叫開心，先會珍惜開心。我淨係想搵到食，然後留多o的時間畀老婆、畀屋企，同我三隻狗。
99年合組Snowman、2000改名Swing唱紅〈 1984〉、11年舉行告別演唱會，拍擋Jerald不如Eric Kwok看得透，一早放棄香港歌手夢。
做過無線《超級巨聲》、《星夢傳奇》評判，Eric Kwok說:「香港唔係冇人唱歌、冇後起之秀，不過陳奕迅，真係要好多年至會出一個。」