無面俾 帶挈唱《囍帖街》謝安琪 拒撐Eric Kwok

今年五月,謝安琪加盟北京「華誼兄弟唱片」,放眼大中華市場,事業扶搖直上,講到底,當日無 Eric Kwok作曲的《囍帖街》,就沒有今日的謝安琪,但對方舉行一連三場作品展音樂會,謝安琪卻全程無影,最後要由蘇永康幫手聲演男版《囍帖街》,難怪 Eric在台上語帶無奈說:「阿Kay(謝安琪)話佢好想o黎!但佢經理人周博賢話夏森美唔俾佢o黎!」

阿 Kay唔俾面, Eric Kwok坦言自己盡了力:「我同佢(謝安琪)有message,佢話好想o黎!我有親自打俾周博賢,但佢無覆我!後來阿 Kay話接o左o野做,所以o黎唔到!」相對有份演出的陳奕迅、李克勤,寧願推job見財化水,都要上台做嘉賓,俾面又夠義氣。

講心唔講金

作曲人Eric Kwok,上個禮拜舉行三場作品展音樂會,但原唱者阿Kay謝安琪卻全程無到,反而歌神陳奕迅,唱足三場、晚晚唱超過六首歌,仲做埋搞笑環節,由頭撐到尾。「Eason年頭知道Eric會做作品展,二話不說應承做嘉賓,佢工作期表有幾密,大家都估到,但佢講明,點都要遷就Eric個期,呢o的咪朋友囉!」一名工作人員說。除了 Eason,梁詠琪、蘇永康、梁漢文等個個唱足三晚,而剛在巴西睇完世界盃的李克勤,亦推掉內地商演趕返香港做嘉賓。

蘇康代唱

「創作人開作品展,主要係靠班歌手撐場演出,同之前Wyman、Mark Lui開騷一樣,歌手只會象徵式收利是,呢o的時候,根本唔會計較錢銀,始終遇到一首好歌唔容易,純粹想報答創作人o者!」知情者說。

零八年,Eric的作品產量唔多,當中《囍帖街》能夠突圍而出,對Eric的事業,絕對意義重大。「其實零五至零八年,Eric冇乜點寫歌,零八年《囍帖街》唱到街知巷聞,橫掃晒大小頒獎禮,甚至將謝安琪推到做天后,所以Eric根本無諗過,阿 Kay會唔o黎唱呢首歌!」知情者說。

音樂會以「頒獎禮」形式串連,十首Eric Kwok「我最喜愛歌曲」,每晚都有些微變動,但三晚都由《囍帖街》成為第一位歌曲。原唱者無影,最後由蘇永康代唱:「做兄弟o既o野,兩肋插刀無所謂!」蘇康幫手寸阿Kay,Eric見o黎足三晚唱《傷逝》的葉蒨文,台上一時感觸。「有o的人你以為佢一定會o黎,點知佢又唔o黎,有o的人你無諗過佢o黎,佢竟然晚晚都o黎!真係好多謝佢!」

無回覆

完騷後,向Eric求證阿Kay無影一事,他無奈說:「我同佢有message,亦有親自打俾周博賢,但佢無覆我。後尾經我management同事,知佢o黎唔到,我咪自己打俾阿Kay囉!佢話佢好想o黎,但因為接o左o野,所以o黎唔到。(會唔會好遺憾?)最緊要首歌有o係個 show度出現,邊個唱都唔重要。」


Eric Kwok表示, GiGi早年已用他的作品,儼如帶佢出身


李克勤由巴西趕返港,出席 Eric Kwok音樂會


Eric Kwok承認,有親自致電邀請阿 Kay做音樂會嘉賓,可惜最後都唔成事