生命大過天 活著多好

Eric:「糾正你o既人生態度。」

英皇群星合唱o既勵志歌曲《天生不倒》係前Swing o既成員Eric Kwok作曲、監製,唔好以為Eric o既歌咁勵志樂觀就代表佢一生順景啊!Eric就話兩年前同初戀女朋友分手係佢人生o既最低潮,不過再唔開心佢都冇諗過放棄生命:「人生態度好重要,大家學下積極正面o的去面對問題啦!你會發覺其實你係捱到o架!」

點睇呢排咁多自殺事件?
「社會風氣問題啦,大家都有困難,咪互相影響鑽牛角尖囉!我反而覺得報紙應該多報導呢o的新聞,等o的人見到其實死解決唔到問題,重增加你身邊人o既負擔添!」

你人生中有冇遇上低潮?點樣面對呢?
「兩年前,我同拍o左六、七年拖o既女朋友分手,o個陣時都算係最低潮,初頭實唔開心o既,不過信我啦,時間會沖淡一切。我不停話俾自己聽,我會搵到一位更加好嘅女仔。」

有冇好建議俾o係困境中o既人?
「都係o個句啦,生命真係好重要,冇錢使咪使少o的囉,失戀咪搵過第二個囉,壓力大咪聽〈天生不倒〉囉,你梗有自己迎辦法解決o架!只要記住,唔好放棄。」

最後有冇鼓勵說話講俾佢o地聽?
「做人o既o野,開心o的,樂觀o的,眼光放遠o的,過o左呢一關,明天會更好o架!」