打機毒發〈囍帖街〉Eric Kwok
本地最活躍作曲人兼監製，每年都有一首爆hit歌，Eason 04年〈十面埋伏〉、05年〈夕陽無限好〉、06年〈落花流水〉、08年謝安琪〈囍帖街〉，一概收錄o係新作品集 《LEET COLLECTION》入面，獨欠07年?佢掛住打機
最喜愛大碟:《悠長假期》soundtrack「我成日煲日劇，《悠長假期》更係最有感情。」
《迷幻沙灘》soundtrack「集齊當年世上最紅音樂人作品!」
最喜愛電影:95年《月黑高飛》「睇過超過20次，影響我一生o既電影，每次同人合作都會盡量同佢o地睇一次，謝霆鋒一邊睇一邊駁古，Eason睇到喊，名句『Fear can hold you prisoner.
Hope can set you free』係我左右銘。」
93年《Groundhog Day》「Bill Murray o既代表作，講不斷重複去活於同一日，好多電影稿如《First 50 Dates》都o黎自呢套。」
沉迷World of Warcraft
《月黑高飛》可以睇20次，每年都必定去滑雪，日劇要一口氣一晚睇晒，Eric Kwok一沉迷就瘋狂。 「我信奉《月黑高飛》套對白同睇法，儲錢唔多，唔買樓鍾意租樓，而且興趣超多，遇到真係鍾意更不能自拔，好o既有13歲時第一次沉迷媽咪送o既電子琴，啟蒙我愛上音樂作曲，衰o既有呢兩年沉迷到幾乎前途盡毀的online game《World of Warcraft》。 」
瘋狂程度o係Eric新歌〈WOW〉歌名就係呢隻game簡寫，歌詞:「別日日怨我繼續打機，別日日怨我繼續晏起.....」歌詞大意是我行我素，實質呢位已經35歲仲係瘋狂機迷o既流行曲監製，已經知死 。
「俾朋友『導』o既,足足近兩年時間，日日返工咁打足8至10個鐘，甚至通頂幾日都試過，以前聽到人用真錢買game money會笑戇居，結果舊年我真係畀錢同Chinese farmer買(專幫玩家賺 錢o既中國職業gamer),歌冇乜作過、朋友冇乜見過，連阿Grace(葉佩雯)都要同我一齊玩先有話題，直到一刻Grace鬧我:『你真係好唔掂啦!租都冇錢交喇!』Eason又打畀我鬧話:『你個朵臭晒喇!』先知死......o依家?打少好多......。」