Eric Kwok影葉佩雯艷照:試過幾次都唔成功....

蘋果即時新聞

3/9/2014

噚晚一本男士時尚雜誌,o係西環舉行「FASHION OBJECTS DESIRE Awards」活動，一班型男陳奕迅、周柏豪、郭偉亮、許廷鏗、洪永城同埋林樹鑫就獲得年度大獎。佢o地個個都著住秋冬裝現身，仲要o係街頭接受採訪，真係見到都覺得熱，而Eric Kwok仲著住三件頭西裝，雖然好熱，但一樣都咁有型。

講到佢可以攞到呢個獎，佢就笑住話留o左鬚之後男人味重o左,又話接o左幾部電影，年尾仲有會參與一個認真o既劇本，要演一個變態殺手，仲話有o的興奮，問佢係唔係好鍾意睇呢o的變態情節電影?佢就話:「成日煲，一返到屋企就變態，所以其實Grace(葉佩雯)對我好包容。」

問Eric Kwok係唔係第一次做咁多戲份o既電影，佢就話:「戲份就未知有幾多，不過就係第一次咁認真。」佢仲有問過導演，使唔使去街市學人劏豬:「不過導演就話唔使，不過要我瘦多10幾磅，我o依家要開始減，因為我唔可以幾個星期就變張家輝，我仲同導演講，話我講對白唔好，但係導演就同我講，話我個角色唔係好多對白，不過導演就要我做出o個種有臭味o既感覺。」咁學你個朋友謝霆鋒就得，因為霆鋒唔沖涼，Eric Kwok就話:「邊個爆出o黎?好似係Eason爆出o黎,不過唔知佢o依家仲係唔係咁。」

近日荷里活有艷照流出，Eric Kwok就話o岩o岩自己都睇o左,咁有冇同老婆Grace影?佢就笑住話:「佢都唔俾我影，我試過幾次都唔成功。」咁係你影老婆定係佢影你先，佢就話:「我都冇o野好影，梗係我影佢啦。我試衝入廁所，不過我都係玩下，我只係鍾意見到佢大叫，其實最近都有諗過放o的o野放上iCloud，所以o的私人o野,都係唔好放上網。」

Eric Kwok講笑話試衝入廁所影葉佩雯，不過只係想聽佢o既尖叫聲

Eric Kwok o黎緊會o係新戲演變態殺手