Eric Kwok 樂壇名牌 不靠埋堆

14/8/03

太陽報

《十面埋伏》街知巷聞

對陳奕迅來說,《十面埋伏》可能只是他歌手生涯中其中一首冠軍歌,或者是他用心去唱,有人用心欣賞的一首作品。但對於出道五年的作曲人郭偉亮(Eric Kwok)而言,近日唱得街知巷聞的《十面埋伏》,是他口中沒有埋埋、沒有應酬而得回來的另一首冠軍歌。

我們習慣叫郭偉亮做Eric Kwok,雖然出道時就連DJ林海峰、現任女朋友葉佩雯都以為他是葛民輝,不過出過唱片、當過組合歌手而最終解散了的他,已經不會再面目模糊讓人誤會,因為Eric Kwok去年拿了最佳編歌獎,在台上攞獎時還講了一分鐘棟篤笑,已成為樂壇一個新名牌。

「我一直都覺得自己好好彩,一出道就憑《幸福摩天輪》攞獎,同埋有好多首歌Plug上台,我o個年(99年)真係上位上得好快,可以話時來運到,所有我細個想要做o既o野,全部都實現哂,返香港做o野、跟住可以作曲」,作o既歌又攞到獎,係名副其實夢想成真,o個年真係開心到暈。」

對於自己的作品一次又一次地奪得冠軍,郭偉亮覺得好好彩。

頂峰回落抖抖

不過在外國長大o既Eric,並沒有留戀山頂風光,只想著頂峰並不適合自己,那時就認為自己應該休息一下,離開那個地方抖一抖氣,「當時係有o的飄飄然o既感覺,不過企o係山頂度,實在好大壓力,一係要不斷同人鬥,一係就黎番o黎抖一抖,我份人唔鍾意同人爭,攞完獎之後,我好想休息,同埋享受一下自己所得o既成績,唔想再咁樣谷落去,於是我就決定番落o黎。不過決定由山頂落番o黎,我又冇失落感,因為當時我要一心一意去做好Swing,因為我好想唱番自己所作o既歌,o個種感覺唔同人o地去演繹自己o既o野,雖然Swing最後都要解散,但我冇唔開心,只係有o的可惜,我覺得我o地應該可以再出多幾隻碟,同埋繼續會有火花出現,不過我好尊重Jerald(Swing另一成員)o既決定,既然佢做得咁辛苦,我唔想佢唔開心落去。」

除努力做好Swing之外,Eric最怕自己會變成一棵大樹,一棵不斷招風的大樹,令他更明白自己不適合玩這個遊戲,「我知我做唔到o個棵大樹,我唔想Deal With(只係為o左)o個o的o野,話哂我只係想寫歌,唔係要做第一,賺多o的錢梗係好啦!但我更加想多o的人聽自己o既歌。攞獎?更加唔係我要追求o既o野,如果我追求呢o的o野,我要埋堆,要應酬多o的......如果我付出呢o的代價,只係代表我寫歌o既時間會愈來愈少,吸收o既時間亦會愈來愈少,所以我選擇唔做,我覺得凡是講求平衡,我寧願留o係屋企磨多o的歌,如果我成日諗住o的歌要做No.1,又顧住同o的高層去搶,我又點會開心。」

娛樂圈本來就是個令人又愛又恨的地方,坦白的Eric表明喜歡做幕後人,用「麻麻地」形容幕前人,但說到喜歡不喜歡香港的娛樂圈,他認為沒有選擇權。

幕前人麻麻o地

「我鍾唔鍾意香港娛樂圈?我覺得係冇得選擇,我鍾意之前o既經驗,鍾意同我一齊做o野o既人,同我一齊出生入死班兄弟幾好o架!佢o地只係打份工,唔係要爭個你死我活,對於幕前o既人,我覺得麻麻o地。我知道每几都有咁o既情況,如果要達到目標,就要付出,而做幕後唔需要掂咁多o野,年尾先可以攞獎,或者Plug多o的歌,雖然我選擇唔做,但我運氣好好,有好多歌都攞到冠軍,同埋我能夠做到自己最鍾意o既o野,有o的人就算好有條件都未必有機會,所以我真係好好彩。」

《十面埋伏》的兩個愛情故事

如果你還未聽過這個愛情故事,就由男主角Eric再講一次:「有一個被我傷得好重o既女仔,我同佢分手之後,佢一直迴避所有有關我o既o野,無論係一個電話或者一張問候卡,佢都唔要聽唔要睇,佢話唯一想做o既,就係同我永遠絕交。我同呢個女仔拍o左拖好多年,大家曾經深愛過,雖然我只係出於關心去搵佢,但o係佢角度,佢根本唔想再知道關於我o既任何o野,所以佢選擇不聽不聞,我依家諗起都覺得自己好自私,我關心佢可能係出於補償,但佢經辛苦先可以Get Over件事,我唔應該再令佢諗番起以前o既o野,我依家比較明白佢o既心情。」

難得的是,對Eric寫了一首關於前度女友的歌,現任女友葉佩雯也很明白,她說聽後非常感動,這相信也是《十面埋伏》外,另一個愛情故事的延續。