Eric葉佩雯紅館拉埋

太陽報

24/11/11

唱作人Eric Kwok為紀念昨晚是他與Swing隊友Jerald首次、亦是最後一次紅館騷，在台上跟拍拖10年的葉佩雯結婚，謝霆鋒為他們證婚。現年37歲的Eric(郭偉亮)及31歲的葉佩雯(Grace)向來是圈中的模範情侶，惟一直未傳喜訊，昨晚是Eric踏紅館的大日子，與Jerald(陳哲廬)舉行1場《Swing後會無期告別演唱會》。為紀念人生里程碑，他決定於紅館萬人見證下，向擔任嘉賓的Grace公開求婚，並即場進行簡單而隆重的結婚儀式!

演唱會尾聲，Grace上台跟Swing合唱，然後Eric叫Grace企定說:「今年做o左三件大事，依家想做第四件，Swing已經11年，Jerald要離開我，我要搵一個拍檔唔會離開我，今晚呢個拍檔都o係度，就係你葉佩雯，你同我度過風風雨雨，依家我想做一樣嘢係第一次同最後一次。」Grace掩面狂喊，Eric誠懇地說:「錢我冇乜，但我有樣o野畀你，就係幸福。」隨即送上88枝鮮花，代表8月8日，亦是無限符號，大叫:「葉佩雯，你嫁畀我!」Grace感動到喊，Eric送上大鑽戒求婚:「所有我o地最親o既人都o係度，仲有朋友，但呢個未算係驚喜，仲有樣o野。」之後Eric請律師、好友霆鋒、陳奕迅夫婦、梁漢文、蘇永康、陳子聰夫婦等上台，各人用手機狂拍，Eric笑說:「今次畀480蚊人情抵晒!」並即場進行結婚儀式，Eric準備一套神父衫給霆鋒:「當日我做你證婚人，今日要你做番我證婚人。」霆鋒即套上神父衫，新人交換結婚戒指、濕吻，Eric還伸"月利"錫老婆，霆鋒說:「呢個咁壯嚴o既時間唔知講乜好，其實我滿心祝福，亦滿腦都係粗口!現場咁多兄弟，點解要搵一個o岩o岩離婚做證婚，你攞景定贈興!」Eric笑說:「呢個世界好難講。」之後唱《應承》送給老婆，再來一次濕吻並跟觀眾拍照。

據知，Eric一直希望雙方親友陪伴踏入人生新階段，最希望出席他們「結婚演唱會」的來賓，正是打機好友霆鋒及Grace手帕交柏芝!霆鋒為撐Eric特別請假返港，據知同樣在港的柏芝，聲稱以「唔想搶新人風頭」為由避席。

Eric與01年仍是「英皇三小花」的Grace因合作而日久生情，兩人拍拖初期曾玩地下情。06年，Grace與唱片公司發生合約問題，有傳Eric暗中幫女友提前解約，並引薦她推出搖滾唱片。08年Grace離開樂壇，全心全意做Eric的跟得女友，不過曾傳有第三者介入，幸最終大團圓結局!

Eric與葉佩雯結束愛情長跑，並在紅館結婚，一對新人當眾濕吻，場面感人

霆鋒穿上神父裝，為Eric與葉佩雯證婚

Eric在紅館逾萬名樂迷面前跪地向Grace求婚

Eric為Grace戴上戒指，令太太感動落淚