WYMAN衣著人詞

星島日報

17/2/2012

有想過會以時裝去將歌詞實體化嗎?

有試過一、兩套衫,著上後覺得好似某首歌的元素，這是會有的，但從不會先有句歌詞再搵套衫去襯、去實體化歌詞，因為有甚麼場合要這樣做呢?冇喎，你不會有一日要去朋友大壽，於是我就要將Eric Kwok的〈生日快樂〉變成一套衫，也不會去婚禮前跟自己說:『好，我今日就要穿〈小玩意〉!』反而試過穿過某套衫後覺得真係幾「一刀插入你心」喎，咁就有。

幫人襯衫同幫人度身訂造一份歌詞，過程類似嗎?

我幫一個人買衫反而更獨裁，寫歌詞會度身訂造，如果一套衫你不是好believe，最多都是一晚，甚至只不過是3張相的時間。但一首歌詞會反覆唱好多次，甚至幾十年，如果要人唱一首不接近性格的歌會有難度。雖然唱歌和演戲都是一種表演，有時可以飾演另一個人，但我發現香港的歌手、監製、唱片公司，全都不buy這套，都認為歌手唱的歌一定是自己，這個諗法是悶到黐線。

那講婚外情的〈無人之境〉，算是一次成功爭取?

沒爭取，也沒尷尬，我覺得這刻可以將真相講出來。〈無人之境〉本來是Eric Kwok給我的訂單，講明要寫婚外情，而且本來的設計是同一首曲同一份詞，再由謝安琪唱一次。所以寫〈無人之境〉時是男、女角度都得。收到歌詞後，因為陳奕迅是百毒不侵，大家對他做的古靈精怪事情已經見怪不怪，所以他肯唱。但謝安琪的經理人就覺得太敏感，而且一個女仔話自己有婚外情是很奇怪的，她也不是陳奕迅，不是做甚麼大家都會接受，況且當時正有傳聞。其實Eric Kwok的意思是既然當時有這傳聞，所以專登寫這首歌去正面衝擊，最初應該有跟謝安琪講過，而她又覺得幾得意，但到真正收到歌詞就開始擔心，而當時傳聞也發展到對她有不良影響，所以結果沒成事，以我所知其實她已經錄好音了。我是完全明白，反正我不會辛苦 ，我只是收到訂單後炒碟楊州炒飯出來。