Swing樂隊想起咀嘴傳膠片心花怒放

Cyber日報

28/4/01

樂隊Swing昨晚為新城所辦之歌唱比賽擔任表演嘉賓及評判，兩位成員心情可謂靚爆燈，一見娛記即滔滔不絕，原來二人正為任揀「咀嘴」拍檔而大感興奮。

事緣Swing將於下周五上《勁歌金曲》任嘉賓，奉旨大玩咀嘴傳送膠片遊戲，有機會親自挑選遊戲拍檔，但兩人竟然放棄一親圈中女星芳澤之機，揀鍾兆康為頭號人選。有娛記問葉佩雯(Grace)之「好朋友」Eric何解不選Grace為拍檔時，Eric笑而不答，另一成員立即擋駕道:「陳冠希已經揀o左葉佩雯做嘉賓啦!即使Edison(陳之洋名)有請佢，都一樣會被我邀請，那個遊戲只派出一個人玩，唯一的Quota已經被我搶o左喇!」話畢只見他身旁的Eric繼續但笑不語，原來伊人一早已被邀，難怪唯有揀同性密友當嘉賓了。