郭偉亮請鐵甲奇俠睇騷

東方日報

23/5/2014

今時今日的郭偉亮幾乎和扮演鐵甲奇俠Iron Man的羅拔唐尼畫上等號,叫他做Iron Man的人可能比叫他真名的還要多,難得他也不介意被扮演這個角色,還食住條水在廣告中幽自己一默,他更笑言已邀請羅拔唐尼到他的作品展,來個真假大對決!

音樂人郭偉亮(Eric Kwok)7月將在紅館舉行三場《我最喜愛ERIC KWOK音樂會》,相信大家一提起他就會即刻聯想到羅拔唐尼,其實Eric自己怎睇?他坦言非常樂意接受:「由細到大如果畀人話你似邊個,總會唔開心,要special嘛,點解要似邊個o者?但我個case有o的唔同,有邊個會唔想似Iron Man先?又有女又有錢又有權,直情係超人,所以似Iron Man係最好o架喇,我冇所謂!」

既然上次在廣告中扮羅拔唐尼的Eric都已抽足水,不如今次請真身現身演唱會,他認真地配合說:「問緊問緊。」並大爆可能會請在廣告中扮神盾局局長的黑人朋友現身:「問o左喇,不過佢真係好full schedule,可能會o黎到一日。」

嘆謝安琪缺席

當然,Iron Man終究也只是個噱頭,整個演唱會靈魂當然是他十多年來創作了超過300首的歌曲,陳奕迅、楊千嬅、葉蒨文、梁漢文和吳雨霏等20多位歌手一口答允演出,Eric笑言原來碌「人情卡」話咁易:「本來以為要好辛苦係咁打電話,原來只要夠膽問就得o架喇,最多咪唔好o黎囉!」

雖然只是講笑,但難免讓人對號入座,例如憑《囍帖街》橫掃十多個金曲獎的謝安琪就未有答應現身,Eric也有點不是味兒:「講真唔知點解佢o黎唔到,佢經理人亦冇畀好合理答案我,我諗真係有好緊要o既o野做啦,緊要過o黎我演唱會。(好hurt?)都有o架,話晒隻歌對我o黎講都緊要,我諗對於佢o黎講唔係好緊要啦,都有少少差o的,不過唔緊要,我有好好o既解決辦法。」


郭偉亮在作品展中碌盡人情卡,遺憾謝安琪未能赴會,他坦言有o的hurt!


郭偉亮笑言想請羅拔唐尼看音樂會