聽陳奕迅live唱《貝多芬與我》Eric Kwok感動到想喊

蘋果即時新聞

10/7/2014

Eric Kwok(郭偉亮)今日o係尖東出席記者會，佢話o黎緊會幫一個錄音室做導師，開設課程，培育新一班年青音樂人，等佢o地有途徑去學，佢話自己入行時，都係靠自己去學，冇課程教，今次佢會一星期教兩、三堂。至於佢酬金幾錢?佢話要視乎幾多人報讀。

Eric Kwok下星期開騷，佢話噚日同Eason(陳奕迅)綵排，聽到佢live唱《貝多芬與我》，可能好耐冇聽呢隻歌，仲要咁近唱，都差o的喊出o黎,佢又話Jerald今次會幫佢做指揮，但綵排就見佢動作好大，自己都忍唔住叫佢收斂下，佢話:「以前組合時反而會客氣講，因為驚佢嬲，但今次唔使驚，佢係服侍我o既。」

佢又話今次冇刻意操fit自己，因為上次Swing演唱會減得太瘦,o的人都問佢係咪吸毒。提到有指張耀揚o係內地吸毒被捕，Eric話希望佢快o的脫離呢個險境，佢話見過對方一次，都好好人。