打造《囍帖街》又如何 Kay拒撐Eric Kwok

Next Plus

23/7/2014

咦!點解Eric Kwok作曲o既《囍帖街》變o左蘇永康唱o既?咪因為原唱者阿Kay謝安琪唔識飲水思源，拒撐Eric Kwok囉!

一連三場，以「頒獎禮」形式串連o既Eric Kwok音樂會，上星期六落幕。三晚Eric Kwok都揀o左《囍帖街》為「我最喜愛歌曲」第一位。不過三晚原唱者阿Kay都無影。

依家阿Kay撈到風生水起，今年5月加盟北京「華誼兄弟唱片」，放眼大中華，事業扶搖直上。不過講到底，當日若果冇Eric Kwok作曲o既《囍帖街》，幫佢橫掃各大頒獎禮，將佢推到上天后level，點會有今日o既謝安琪呀!

反而音樂會驚喜位係前輩葉倩文晚晚都有o黎唱《傷逝》，搞到Eric Kwok台上都一時感觸咁話:「有o的人你以為佢一定會o黎,點知佢又唔o黎。」又語帶無奈表示，阿Kay經理人周博賢話夏森美唔俾佢o黎。

而台下Eric Kwok一提起阿Kay，個樣又愁爆。「我o地有message o既,佢自己話想o黎。我亦有親自打俾周博賢，但係佢冇覆我。後尾我management同事，知佢o黎唔到，我咪自己打俾阿Kay囉!佢話好想o黎,但因為接o左o野,所以o黎唔到!」

不過睇番阿Kay o既微博，17日Eric音樂會頭場，阿Kay就留o左o係屋企織手繩，18、19號先返去大陸做o野。

被問到會唔會覺得遺憾，Eric Kwok就話:「其實Cass(彭羚)都o黎唔到唱《一枝花》，其實最緊要我鍾意o既歌出現o係個show度，邊個唱都唔緊要。」人o地都話唔會o黎喇，唔係咁樣安慰自己仲可以點呢?