Swing可以生存已經好開心
作為香港買少見少的組合,正在籌備新碟o既Swing兩位成員都異口同聲咁話:「仲可以做唱片,仲可以o係呢行已經好開心!」點解咁悲觀?Jerald解釋話,而家組合唔同80年代,要夠獨特,而且慢熱,但係多得英皇老闆楊生同高層李進!Eric都話,好在佢兩個深明大義!
多謝楊生
Swing話可以出唱片,可以成功由當年o既Snowman進化成Swing,可以做到自己想做o既音樂,第一個要多謝楊生,第二個要多謝高層李進。Eric:「係李生簽o左Swing o既,係佢睇好我o地,俾我o地創作空間同埋繼續出碟o既機會!」Jerald:「仲要多謝梗係老闆啦,楊生同公司俾o左百分百o既創作自由我o地去做Swing o既音樂!楊生好好,佢清楚知道組合唔會一炮而紅,屬於慢熱o既佢永遠唔會催我o地,俾壓力我o地,我諗佢o地係睇到我o地o既努力同埋做出o黎o既成果!」
黃金陣容
Swing將於6月中推出佢o地o既全新大碟!講起呢張碟來頭認真唔o野少!除o左Edison陳冠希會負責其中一隻歌rap o既部分,連Eason、霆鋒、葉佩雯都會幫手唱好Swing。咁呢張碟o既創作路線又係點呢?Eric:「今次呢隻碟好大膽,好玩o野,相比上一隻真係極端好多!」Jerald:「其實裡面都有o的大路o既歌,我同Eric不嬲都係分工合作o既!佢就會負責o的大路小小o既抒情慢歌,我呢就專做一o的rap歌同埋比較玩o野o既歌。」總括o黎講,Swing呢隻新碟唔單止新穎、新奇及歌路多元化,仲有紅人聲音演出,果然聲勢強勁。
終身伴侶
問到Eric同埋Jerald有冇拍拖,兩個竟然都大大方方話有喎!咁搵到理想伴侶未呢?兩個又話有喎,果然夠大方!Jerald:「主要咪食飯睇戲囉,算係拍拖呱!我揀女友最重要o既一樣o野就係understanding呢樣o野,『佢』俾到我,已經好足夠!」
Eric:「我諗我都搵到啦!我對女仔o既要求就係體貼啦,細心啦,同埋要夾,想法要一致!呢o的優點『佢』都有o架!」成功o既二人組合梗係要有兩個背後o既女人啦!有才華、有膽識o既Jerald同埋Eric再加上有女人,掂呀!前途一片光明!