葉佩雯肚凸凸 Eric Kwok人肉護妻

都市日報

8/9/2014

「Iron Man、Iron Man，無敵化身，鬼咁多錢，鬼咁多女......」o拿,有港版Iron Man之稱o既Eric Kwok(郭偉亮)，就梗係冇羅拔唐尼咁多女啦!不過講到好男人，佢未必輸畀正版Iron Man，睇佢對老婆葉佩雯(Grace)咁專一就知啦!近排CIB仲見到Grace肚凸凸,著鬆身衫又用手遮肚，孕味濃喎!

日前CIB就見到Eric同Grace o係大坑食魚蛋麵，見Grace勁開胃，唔使10分鐘就食o左成碗麵，肚凸凸o既佢加上一個幸福雙下巴、鬆身衫同平底鞋，孕味甚濃，佢行出餐廳o個陣又手袋遮肚，發現CIB時又匿埋o係老公後面，尋日CIB忍唔住問Eric究竟老婆係咪有喜，Eric就笑笑口:「唔係啦，我o地兩個都唔諗住生，佢肚凸凸可能有其他原因啦。(肥?)o拿,我冇講過呀!(咁會唔會有意外先?)唔會啦,o岩o岩先見完親戚(月經)。」Eric又話畀CIB聽雙方父母好開通，所以唔會要佢o地生，再問佢o地會唔會領養返個啦，Eric就話佢兩公婆鍾意自由:「唔會啦，我o地有3隻狗，同埋香港唔適合生，生o左亦都好大責任。」港版Iron Man果然有原則。