千嬅企硬冇得是但

太陽報

23/11/2006

Eric先後與容祖兒、楊千嬅、梁詠琪(GiGi)合作，原來在他眼中，祖兒為人很細路，千嬅很有主見，梁詠琪因太拘謹而影響了唱歌。

楊千嬅勝在有風格

楊千嬅同我好似孖生兄妹，我o地同月同日生，性格好似，所以默契比其他歌手好。千嬅性格同祖兒就掉轉，千嬅好有主見，清楚自己要乜，又肯聽別人意見，考慮完會接受。

雖然有人話千嬅唱live失準，但自己都有失準，個個人耳仔唔同，唔同場合唱歌有唔同影響，呢幾年佢唱live穩陣好多，有o的人雖然好穩，但好悶，好似克勤唱live好，但畀人話冇突破，千嬅就好有感情、有品味、前衛,佢唱歌好有風格，我覺得風格緊要過技巧，唱功亦愈o黎愈好。佢學o野又快，講一次就明。

容祖兒浸出唱功來

未同祖兒合作之前，覺得佢個人好「假」，成日唔知佢諗乜，無論形象、訪問，都離唔開大細路咁，但合作之後，發覺佢份人其實好簡單，鏡頭前、後都係咁。

祖兒在唱歌上同陳奕迅好似，都係好誇張、好放，相比其他歌手，祖兒近幾年唱得好穩，我都幾尊重佢，佢經歷咁多o野,去到呢個位，要尋求新突破，佢好勤力，成日練唱歌，佢o既唱功係浸出來。

祖兒性格上o既優點係可以令身邊人開心，好容易感染人，又就得人;每個人都有主見，但祖兒就飄忽o的,最大缺點係唔知自己要乜，如果做唱片唔清楚自己要乜，就企唔硬，變得把持不定，好似我寫o左首歌《應承》畀佢，佢好鍾意，但佢唱片公司嫌唔夠商業，結果我自己唱番，隔好耐之後祖兒話鍾意想要，但已經太遲。

梁詠琪含蓄難煽情

GiGi比千嬅更加有主見，佢性格唔係誇張、好放o既人，但唱歌需要完全放鬆感情，所以GiGi好難做到煽情表達，但呢個亦係佢o既風格，GiGi把聲就係佢風格，唔使太多變化，佢o係假聲同真聲運用上好好，咬字好正，好難得，缺點係感情可以再放o的。不過佢o係作曲、填詞上好有創意，在創作上有好多變化，有助佢唱功進步。