郭偉亮手口並用冧番扁嘴葉佩雯

東方日報

葉佩雯(Grace)同男友郭偉亮(Eric)拍拖咁多年，兩個都老夫老妻咁款。不過前幾日八太見佢兩個去中環買影碟時，Grace就嘴扁扁兼面黑黑，兩個人仲行到離行離列，之但係Eric郁郁手示意女友拖手仔時，Grace即刻極速翹住男友手臂，兩個又由水溝油變番糖黐豆，冤氣到暈。

葉佩雯(Grace)自從同o左男友郭偉亮(Eric)拍拖後，咁多年嚟o黎佢都做Eric背後o既女人，好少o係幕前出現。以為Grace同Eric拍o左拖咁多年，都差唔多會拉埋天窗啦，點知佢兩個都係冇乜聲氣，仲異口同聲話好滿意依家o既感情狀況o添。八太每次見佢兩個孖住出席活動時，雖然佢o地仲未結婚，但就成對老夫老妻咁款。

前幾日Grace同Eric仲拍住拖去o左中環行街街,o個日都成夜晚七點幾，雖然天都黑齊，但見Grace仲戴住副黑超，同男友o係置地廣場附近o既名店行咗一輪，不過就乜都買唔到。

為買影碟鬧不快

兩個之後就入o左間影碟舖揀影碟，八太見Eric鬼咁開心，咩碟都睇一餐，仲擒擒青掃o左成十部八部戲，點知Grace見到佢「大出血」就即刻"目及"住佢，Eric當然唔罷休，仲揸住o的影碟同女友講o左一大輪「道理」，施施然行去櫃枱畀錢，跟住佢後面o既Grace當堂嘴扁扁兼面黑黑。

九秒九變糖黐豆

兩個之後行去蘭桂坊附近時，仲水溝油咁款，行到離行離列隔o左幾個身位，不過自知激嬲女友o既Eric都好識做，「手口並用」氹番女友，見佢望住Grace講o左幾句後，又手郁郁咁示意女友拖番手仔，Grace梗係即刻冧晒啦，仲九秒九翹住男友手臂，兩個之後仲邊行邊傾，甜蜜蜜行入餐廳撐臺腳，冤氣到我八太都唔覺意打o左個冷震。

Eric出口氹完女友後，又手郁郁叫Grace拖住手仔，兩個即時糖黐豆和好如初。

去到影碟舖時，Eric上晒電咁一口氣揀o左成十隻碟，不過Grace見到就即刻制止佢「大出血」

葉佩雯見男友付款，即嘴扁扁一臉不悅