Swinging on the other side!

am730

14/11/11

「係咪真o架?」
「唉呀......我單身就話唔可信o者......個女22個月大，得我同老婆輪住湊」。對於人人質疑又拆夥，Jerald抱著頭快要爆炸，Eric在旁笑笑口。每一位創作人總要適時let it go，匿埋、修行、放洋、潛水......他日回來時必定帶我們走得更遠，像兩人第一次解散，明明說swing不將貨就價，亦將那種臨終時的天荒地老留給我們，7年後，卻又伸來一腳搞笑的《武當》，畢加索回來了喇!作為歌迷，總願耐心地等你回來，若不回來，也會適時let you go，Jerald，俾心機湊女呀!

Jerald(陳哲廬)比Eric(郭偉亮)巴巴閉，與他在歌曲裡bi le ba la無分別，Eric總是氣定神閒去和應。Jerald像leader，兩次拆夥都是他話事，一講起從前與娛樂圈拉鋸就帶點不屑和繃緊，理應覺得他好沙塵，加上再度傷歌迷的心，嗚嗚......奈何Jerald實在有才華，而他第一次要走的灰，其實包裹著熱愛音樂的不忿之心，愛女情切亦天經地義o丫,我，就原諒了他。至於帶點滄桑味道的Eric，那邊廂說好難再搵partner，想來想去，惟獨Eason可以一齊咁癲，真是窮途寧願一人垂頭走:「嗯，應該都冇o架喇......講天份，仲要講性格。將來我會再做多o的音樂，另外最大興趣係做編劇或者導演，之前拍過MV真係好鍾意，或者拍documentary......」Jerald立即搭咀:「dark side of Hong Kong music industry!」。

合作六年分開七年，做音樂日見夜見，再分開都沒有不捨得，Jerald更說好彩冇學Eric沉迷打機，反而學懂極度執著。「以前做音樂想human o的唔想太電腦化，但Eric成功就係因為執著。我身為監製唔可以太free，否則會俾人誤會係馬虎。」Eric:「佢變成咁我都嘩一聲，可唔可以調番轉角色?......打機我已經戒o左啦。」

Swing曲風繁多，玩jazz玩rap玩浪漫，但不入腦的人會話隻隻都差唔多，更好笑是以為兩人在唱聖詩。回顧snowman與swing兩個時期，感覺上，前者大部分歌曲也是各自分開唱;後者則層層疊你一句我一句和唱，樂器、聲效與編曲互相配合的那種複雜融和，簡直令人興奮，最重要是永不會將chorus重複又重複，見好就收，愛Swing莫過於此。Eric如此解構:「swing是成熟的，可以真正代表我o地。Snowman只係摸索，當時用o左好多o個個年代o既電子音樂，依家聽番會覺得舊;swing就用好多原音樂器，比較襟聽。」Jerald:「snowman時我都唔知用邊把聲好，直至錄《半張飛》先搵到自己。」

某段時間，兩人努力地做訪問、影相，宣傳效果卻不大，家人朋友都話睇唔到，對此萬分心淡，然而09年再出碟，大家已放低那種要證明自己的私心，來到盡頭，終於都可以鍾意寫乜就寫乜，聽新碟《Swing到盡》那首《無限》好難明，以為兩人神經錯亂，點知就係要你唔使聽得明;pop慢歌《那邊見》講靈魂，好唔「老黎」，原來代表著Swing的分離，但仍可與歌迷「See u on the other side」。所求無多，只求能深深，愛過。

Fan facts about music

1.《打者愛也》同《shut up》點解會share同一個melody?
E:作《打者愛也》o個陣好興自編鈴聲，我都編o左呢首歌做鈴聲;而《shut up》咁o岩講周圍太多手提電話聲好嘈，咁o岩就夾番條鈴聲落去。

2. 《JAL 565》開段同尾段o既機艙廣播錄音，係咪呢首歌o既靈感?
E：《JAL 565》o係snowman時期已經作o左,後來放落《on fire》時編曲變得更成熟。我o地好鍾意去北海道，想寫首有關o既歌，所以專登搭飛機時錄。錄o個陣好多雜聲o架,後來又將個key fine tune o左少少。

3. 《忍者》有一段rap，你o地忍唔住笑，究竟笑咩呢?最後o個句歌詞係咩?
J:係"I don't know"。Eric建議整段rap，我咪即興囉，結果一take過時忍唔住笑，依家就覺得好得意，好彩當時冇執過。當時香港未流行rap，未有Mc Jin，係一個好水皮o既free style rap。
E:水皮o既free style rap都係一個style喎!

4. 《1984》點解會有「Last x'mas version」?
E：當年我o地對《1984》派台好有信心，但始終上唔到no.1，於是做多隻x'mas版，當係extend，最後放o左o係《for sale》。

5. 點解《黑雨天 白鋼琴》呢首歌可以咁浪漫?
J:當時我好掛住加拿大屋企，Eric叫我作首歌， demo版都叫《homesick》!chorus係好唔開心o既,但歌詞係林寶構思。呢首本來係《snowman》最後一首，代替《無中生有》，但Eric話前面o個段似太劉德華o既《一起走過的日子》......後來想將隻歌俾學友唱，歐丁玉話隻歌太舊，結果我o地留番自己唱。
E:開首段落雨聲，真係o係黑色暴雨時錄o既,記得2000年暑假落雨落得好勁，我都錄o左好耐。

Swing冇正冇經

記:Eric，你瘦o左好多喎?
E:係呀，我吸毒嘛......我有貨，你要唔要?

記:你o地咁鍾意玩，特別鍾意玩淋水淋意粉，仲有咩想淋?
E:冇喎，或者o係演唱會淋觀眾囉。
J:係喎，一大棚淋落去o架嘉賓度!
記:我應該坐得唔前，好彩!
E:我會照顧埋山頂o的朋友，由山頂流到去山腳。

記:香港搞演唱會好著重服裝，你o地換唔換衫?
E:換四套衫，但係全部係同一套，不斷換乾淨o既。
J:四套咁多?

記:會唱幾多首歌呀?
E:大約30隻，至140隻......