紙婚補擺酒 葉佩雯發夢失金鈪

爽報

23/11/2012

去年11月於紅館簽紙結婚的葉佩雯(Grace)與唱作人郭偉亮(Eric),趁結婚一周年今晚假北角海逸酒店筵開35席補擺喜酒，陳奕迅、梁漢文、劉浩龍和何超儀等做星級兄弟姊妹團。昨午3時，Eric與媽咪現身銅鑼灣利園，他稱心情不緊張，並笑說:「姐妹話明會玩死我o地,未驚過!」之後Eric往太子取禮服，再去尖沙嘴會合Grace。

昨晚Grace先入住酒店準備，她於電話中說:「每日"目訓"四個鐘，仲發惡夢唔見晒o的金鈪，尤其奶奶送o左六位數珍珠頸鏈畀我，我好輪盡驚整唔見。」問長輩可有催生?她說:「我吩咐o左大家唔好送豬牌，我o地 唔諗住生，奶奶都好開通。」


郭偉亮昨日會合葉佩雯到便利店購物