攞正牌攬女作樂 Eric Kwok 欽點洋模餵食

頭條日報

7/6/2014

多得林海峰慫恿獻計，我們的Eric Kwok郭偉亮也來一次個人作品騷，李克勤、陳奕迅、許志安、楊千嬅、吳雨霏及梁漢文等好友舉手埋位，觀眾立場一定係超值抵睇，三場群星匯演亦極速爆滿，難怪主人家唔多願做宣傳。早前，Eric Kwok欽點22位嫩模為其新歌《Iron man》拍MV，現場囡囡鬥騷胸露腿，好鬼養眼，事前禁止太座葉佩雯監場的Eric Kwok表現風騷，左擁右抱不特止，還吩咐索洋妞餵食士多啤梨，爽喎!

扮Iron Man出位的Eric Kwok，早前為新歌《Iron man》拍MV，事前親自揀女度橋，堅持玩一手包辦咁話，據悉Eric Kwok為控制成本，不惜碌爆人情卡，以朋友價借場，22位索模都係Last minute至埋位，務求三粒鐘內搞掂放人，計到盡。

全情投入好Happy

現場所見，官仔骨骨的Eric Kwok東尼史達上身，游走在嫩模堆中談笑風生，女生收order要低胸短裙上陣，玩黑色誘惑，被欽點坐埋身的兩位索洋模更酥胸半露，Eric Kwok對眼唔多敢正視一點，左顧右盼。

等導演一嗌Roll機，Eric Kwok即投入作樂，可惜班囡囡唔多生性，生硬無表情，接連NG四次，Eric Kwok忍唔住開口說:「自然點就得，笑多點。」他之後又細心對身旁的工展小姐蘇慧恩說:「同平時出去飲o野咁就得，撞下杯，輕鬆點。」

當拍大頭近鏡時，Eric Kwok即落Order分批放人收工，剩低十個有質素的囡囡留低繼續玩，又點名要索洋模餵食士多啤梨，左擁右抱笑得勁風騷。休息時，有囡囡埋身集郵，Eric Kwok即chok住笑擺pose，畫面確實幾惹笑。