獨對老婆耍冧功

東方日報

19/7/2014

音樂人郭偉亮(Eric Kwok)作品展前晚正式在紅館開鑼，人緣甚廣的他有幸請來一眾天王天后撐場!不過Eric對好友毫不畀面，到處辣火頭寸爆嘉賓。

Eric Kwok一連三場的《我最喜愛的Eric Kwok音樂會》前晚假紅館舉行頭場，圈中人緣甚廣的他請來Eason、老婆葉佩雯、「歌神」張學友、葉蒨文、梁漢文、蘇永康(阿公)、許志安、劉浩龍、楊千嬅、王梓軒、鄭希怡等擔任嘉賓，可謂星光熠熠!

雖然Eric請來眾巨星做嘉賓，但竟玩盡好友，當他介紹《囍帖街》時，因為當年謝安琪(Kay)和舊東家環球不歡而散，故Eric不忘暗寸沒到場的Kay:「我打畀謝安琪，佢話真係好想好想o黎,不過之後佢經理人又話佢o黎唔到喎。」Kay經理人森夏美昨日受訪時承認Eric Kwok曾邀Kay做嘉賓，但因檔期問題未能出席。之後Eric請出曾翻唱《囍》的阿公上台獻唱，更不忘向未唱過其作品的阿公抽水:「蘇永康，作品包括......係冇o既!」阿公亦不禁自嘲:「做兄弟就兩肋插刀，但點解把刀成日插o係我身上?」而千嬅上台時，Eric Kwok特別送上火辣三點式「贈興」，更笑指:「係你老公(丁子高)託我買!」令身材平平的千嬅哭笑不得說:「冇可能!其實fit o係下半身，上半身fit唔晒。」

曾為《星夢傳奇》擔任評判的郭偉亮(Eric Kwok)將舞台變成歌唱比賽場地，更邀請陳奕迅、蘇永康、梁漢文、劉浩龍客串任評判，林欣彤(Mag)成為其中一位「參賽者」。身穿露肩短裙的Mag在升降台上獻唱，但唱完後台上幾位評判卻只交「行貨」意見，只說好，令Eric忍不住寸爆說:「你班禽獸見人o地女仔就乜都好。」

歌手吳雨霏(Kary)前晚擔任好友郭偉亮(Eric Kwok)的演唱會嘉賓，當然亦不能幸免被玩!身穿黑色高貴長裙的Kary露出半邊香肩，竟獲Eric Kwok送上一個疑似性器官的按摩器，他說:「價值不菲o架呢舊o野,要成千銀o架!」

Kary一臉尷尬地反問:「咩o黎o架?」Eric Kwok之後解釋是一個按摩器:「Kary係一個低頭族o黎,呢舊o野可以畀佢按摩o下。」

送戒指畀媽媽感動眼濕

Eric Kwok前晚在紅館開騷咁威水，郭媽媽當然要捧愛子場!Eric亦在台上特別大讚媽媽偉大:「記得細個媽咪成日會拎o的寶石出o黎,好開心咁笑。不過因為爹o地係病態賭徒,攞o左o的珠寶去就冇回頭，我想睇番媽咪開心笑o既眼光。」

之後即場向媽媽送上親製的寶石戒指，令她感動到眼濕濕;之後Eric提到去年過身的爸爸時，更一度哽咽說:「我諗佢今日一定睇到，所以我留o左個位畀佢!」另外，前Swing成員Jerald擔任音樂總監，更再次與Eric合體以Swing身份壓軸登場，令觀眾大呼驚喜。

陳奕迅、蘇永康、梁漢文、劉浩龍客串任評判，林欣彤成為其中一位「參賽者」