靈感框框
「創作唔可以跟人,一定要創新、有創意。我平日喜歡一邊坐車,一邊諗o野,搵靈感。」Eric表示創作靈感一定不可以被限制,不可以被框框死。「記得有一次我同Grace去日本旅行,o係佢Shopping時.我悶到死,唯有靠聽商場內o既歌o黎解悶。點知,當Grace問售貨員貨品價錢時,我又同時在問售貨員問題,但我問o既唔係價錢,而係問佢播緊o既係乜o野歌!Boy'z o既《Lala世界》就係因為咁而作起。」難怪Eric也說他的創作靈感是隨時在日常生活中尋找的,完全不受框框限制。
歌曲也有生命
「要令歌曲有生命,首先要從首歌開始,用心創作或唱出。我認為歌手事先應該同作詞人溝通好,對歌曲o既故事、內容有共鳴,先可以將歌曲o既感情表達出o黎」此外,他對於「唱」與「作」的關係有這樣的見解:「當然,自己作、自己唱出來的效果,一定會唱得比別人作俾自己o既歌好,周杰倫和陶喆就係個好例子。」Eric還說出寫歌給其他歌手啪和給自己唱的分別:「自己唱的話,我會『走火入魔』!我對自己的表現好主觀,所以要靠監製幫忙。如果由其他歌手唱,佢o地未必對首歌理解好深,就要監製幫佢o地練習一下。但如果好似Eason o既歌唱技巧同拍子感都咁出色,監製o既工作就係領導佢o地到另一個更高o既層次,唱出歌曲o既靈魂。」Eric坦言,如果一定要選擇做創作人還是做歌手,他會選前者:「我鍾意創作多o的,因為其實我o既歌曲技巧未到家,所以我而家跟緊一個o黎自荷李活o既歌唱老師學唱歌,希望能『進修』一o下,提高水準。」
Eric's Profile
Eric(郭偉亮)曾與Jerald(陳哲廬)組成樂隊Snowman,於2000年改名為Swing。直至2002年4月宣佈解散各自發展,Eric留守EEG繼續創作音樂,全力向幕後發展,為多位歌手作曲、編曲、擔任監製。曾創作的歌曲包括:《步步高》、《十面埋伏》、《楊千嬅》、《煙霧瀰漫》、《幸福摩天輪》、《涉谷車站見》、《民間傳奇》、《Lala世界》等。