梁漢文、Eric Kwok兩麻甩佬齊齊喊

學杜Sir話齋:「男人o既世界好難明!」

要數梁漢文o既死黨,蘇永康、許志安、張衛健、陳奕迅等等呢o的係人都知;不過數o黎數去都好似冇Eric Kwok份喎!但其實佢o地兩個Friend到會為對方流馬尿o架!所以話,男人o既世界唔但只估佢唔到,有陣時原來仲係咁鬼嘔心添呀!

梁漢文冇幾耐之前先開完個演唱會,o抖都唔使o抖o下就走出o黎做宣傳,鬼咩!一o黎女友唔得閒陪佢去遊埠散心;二o黎臨近年尾,要搏係時候;三o黎佢即將推出演唱會DVD,所以梗係要出o黎見人喇!日前佢就搵埋老友Eric Kwok去做Roadshow〈紅人館〉節目,原來呢兩件麻甩佬私底下勁好交情o架!

未熟就認親

L:梁漢文 E:Eric Kwok

L:你記唔記得我o地係幾時識o架?我記得係04年,我做緊一張叫〈四季〉o既專輯,裡面有一首歌叫「步步高」,係你幫我做o既。我記得當時呢隻碟做得好急,要趕住搵人做,你就係其中一個受害者。
E:哈哈,係我呀,我o係2,3日之內做起俾你o架!

L:係囉,但當時因為時間好趕,所以冇好好咁認識!
E:係呀,但係我下意識已經Feel到我o地可以做到朋友!
L:你當時同我講呢番說話時,我覺得好唐突呀!
E:哈哈,係呀,都幾o架!
L:之後o既〈饑饉30〉主題曲「天使愛」係我o地第2次合作,到我上隻碟〈失魂落魄〉就了解深o左喇。

Next