Swing互拍馬屁?
一隊組合,大家如果意見不合,就會好易產生磨擦。由以前o既Snowman,到而家o既Swing,郭偉亮(Eric)同陳哲廬(Jerald)合作o左差唔多兩年時間。雖然佢兩個係由中間人介紹而撮合,但大家一拍即合,音樂上唔止夾,私底下亦好o岩傾,大家全無介蒂,二人對對方有讚冇彈。
互讚作歌好掂
Swing話明係唱作組合,咁不如睇下佢o地點睇對方作o既歌先,「我同Jerald o既歌路唔同,所以o係音樂上就俾到好多唔同o既衝擊大家,對我o地o既音樂有好大幫助,因為如果兩個人style太似,又冇乜驚喜,而我作o既歌比較大路少少...」當Eric講講下之際,Jerald就插咀大讚Eric:「其實有Eric o係度,我1o地Swing先至生存到,因為香港而家比較流行商業少少o既歌曲,而Eric所作o既歌好易得到別人認同....」之後Eric又說:「不過我覺得Swing最特別之處,就係因為有Jerald o係度,因為佢o既音樂比較黑人少少,好特別,令到Swing o既歌曲有別於其他作品。」Eric同Jerald駛唔駛咁謙呀!
雖然而家香港樂壇多o左唔少唱作歌手,但係有幾多人可以唔駛理會商業元素,做到自己真係想做的音樂?Jerald有感而發:「其實我開頭確實唔係咁鍾意商業歌曲,仲幾討厭o添!因為如果乜o野歌都要大路,咁我同Eric做組合o黎做咩呢?而定擺兩個人一齊,都係想俾其他人一種新鮮感。我編出o黎o既歌,係會比較大膽少少,所以我成日都俾人話:『冇o野o架!有Eric o係度呀嘛!』當我知道有一個市場接受到o既作曲家Eric o係度,就會令到我放膽去嘗試去作曲。」
聽完Jerald講,Eric就話:「Jerald講得冇錯,有Swing o既原因,係因為自己寫歌,自己唱返,咁先會俾人一種新鮮感,我o地一定唔會叫其他人作曲俾我o地,咁樣我o地就冇o左自己o既風格。同埋有時自己作o左o既歌,其他歌手會未必唱到o個種感覺,而且Jerald唱歌好有黑人影子,可以match返我o地歌曲o既style。」