Swing完了......音樂夢
好少人可以真真正正從高峰上急流勇退,不過Swing就講得真出,做得到。上兩個月才勇奪「叱o宅最受歡迎組合金獎」的Swing,突然宣布將會於三月底解散,而《Swang Swung》將會係他們的最後一個作品。Swing自三年前成立以來,雖然未至於大紅大紫,但一直有一班喜愛音樂、喜愛他們的忠心fans支持著,Swing將會是他們最美好的回憶。
Jerald:「結束係我o既決定!」
「呢個(解散Swing)係我自己o既決定,唔關佢(Eric)事,因為我覺得我玩夠喇,而且......自己覺得自己o係呢個圈o既前途唔係咁好,自己o既音樂又唔係好適合呢個市場,唔係好夾;自又好想做其他o野,想以音樂為興趣,因為感到自己開始唔鍾意音樂喇;好想聽番自己鍾意聽o既歌、做自己鍾意做o既事,攞番自己對音樂o既愛。」
「始終我係要搵食o既,做Swing呢,佢就搵到,我就搵唔到食囉,好辛苦,所以係時候轉,而且年紀又廿到尾,所以咪咁囉。自己遲o的會轉行,可能做番o的management o既o野,跟人學下o野咁,但唔會係showbiz(娛樂圈)o既。」
「Eric會係一個我會信o既人,唔好話朋友,有時朋友都信唔過,但係佢我一定會信,做生意我一定會搵佢。」Swing唔玩之後,我o地見面o既時間的確係會少o左,但係佢係一種唔需要成日見o既朋友,而且我o地鍾意o既o野又好唔相似,但係我覺得我o地會見o既話會係一件quality o既事,就算係吹水都會係吹好耐o個隻!」
「我一o的都唔覺得可惜,因為我o地所做o既每一樣o野都係值得驕傲o既,出面行內o既人o既口碑係好o既,就算係冇comment o既唔會人藐、俾人踩,但係人o地話好冇用o既,始終都要你賣得o架!銷量呀、受歡迎程度呀,呢o的o野就得唔到,係......係緊要o架對我o黎講,但係今日見到好多唔同o既元素,經歷o左好多o野,覺得我呢個決定其實係o岩o既。」
「當初成立Swing係想做自己喜愛o既音樂,同埋想做幕前試一試,因為自己對幕前覺得好好玩,表演呀,甚至有機會做戲呀、拍劇呀,我係幾鍾意,咁當年有咁o既機會梗係掌握啦。不過做到咁上下發覺原來自己......市場問題啦,同埋經濟唔好,個空間俾唔到我,發展都冇乜用,始終自己生存唔到嘛。」
「Swing成立以來最深刻o既事?好多喎,最、最難忘可以話係『叱o宅』啦,有機會去攞到一個咁大o既獎,重要係金獎,對我o地係一件好難得o既事,代表o左我o地做好多o野都係有人認同o既,唔係話你賣得、人氣好紅就有獎攞o既,我覺得呢樣o野好正,『叱o宅』對我係一個好大鼓勵。」