Swing Mad House Closing
成日話最驚死神突然到訪，令你走之前毫無準備，走得唔甘心。好喇，而家講明你聽你剩番兩年命，有咩好做晒佢，有咩好試喇。咁呢兩年，你心情又會如何?2002年，Swing自言要改變樂壇，要改寫流行曲的使命，結果得個諗字，冇樣兌現到，然後暗暗離開，走得鬱鬱不歡。
2009年，終於睇開了，抱住玩的心態，限定自己玩足兩年，開埋個演唱會，唔成功走，成功都走。
因為冇包袱，所以玩得更瘋狂更癲，唱片封面可以整到成本秘笈，歌曲MV可以唔理歌詞，拍古裝扮大俠，玩超慢鏡倒食物，連出席吒o宅頒獎禮都是一個扮Iron man，一個扮巴斯光年，似是瘋人院走失的院友。
話咁快，兩年大限將到，Jerald坦言今次走得安心,因為要試的都試過,要玩的都玩過,無憾。更無憾是兩位的告別儀式,是在紅館開Farewell party,請哂圈中朋友一齊玩,而你呢?請付上$480,傻唔哂喎。
T:Touch E:Eric J:Jerald
Jerald最終走唔到
要走喇!要走喇!訪問如常進行，但一開口講多o左個「話」，就立即觸動Eric神經......
T:其實今次話解散啦......
E:「話」解散，而家o的人已經唔鬼信我o地,冇晒信用。即係通常話走呢，一個月內好走啦，唔好講足成年都唔走。
T:我係想問講o左解散咁耐，期間有冇發生過乜o野事，令Jerald回心轉意?
J:我就冇，但我有個親戚是睇相，都幾出名，好多名人徒弟。佢有日好認真咁話:「Jerald,你唔會走，因為你臨走前會有好多人搵你做o野,仲會有一個好大的project，有唔錯的offer，令你想留低。」
E:唔係嘛?好驚喎!但而家問題唔係你老婆一定要走喎，個女出年又要o係加拿大開學，呢個係冇得改變o既理由。
J:個offer未出現，所以我都唔知會係乜o野,但我出年6月就一定要走。
E:我知喇!我知喇!你o係度搵到個女朋友，你想走都走唔到，肯定係!
J:等等，我想放個屁先......
E:又或者係你老婆o係香港有個好好o既offer呢?
J:更加冇可能，我老婆走o既決心比我大，冇乜o野offer可以令佢留低。
E:唔係呀!可能有人搵你拍戲呀!拍戲喎，男主角呀!因為我知佢幾恨拍戲。
J:係呀，我想o架。
E:可能睇完呢輯相，覺得你幾似癲佬，開套《癲佬正傳2》俾你，或者《阿旺正傳》。
J:係又好喎。如果真係有機會拍到部戲，我想o架。
T:陳奐仁都拍完戲拎埋最佳新演員啦，你唔係冇可能。
E:係囉，你係咪見到佢咁樣都得，所以深深不忿?
J:梗係唔係啦，我同佢邊係同一個level，陳奐仁喎，差10條街啦。從音樂上、演技上,(E:重量上)唱歌、rap、彈樂器，人o地係另一個level，唔可以咁樣比，對我唔公平囉，我好蝕底o架嘛。哈哈......