Singing in Swing
在逐隻碟講起前，Jerald分享了一個關於組成Snowman的故事， 「其實唱片公司曾經有想過夾埋陳子聰落o黎，組成三人唱作團，兩個負責音樂，然後陳子聰負責唱，志在有個靚仔可以望o下，但因為佢當時身在澳洲做model，冇等埋佢就開波。」如果當年肯等一等，Swing仲會唔會係咁樣?冇人知，只知道如果有埋陳子聰，製作專輯o既成本可能有何生照住而冇咁頭痕。
《Snowman》零反應 - 由於是第一隻碟，Eric跟Jerald放了不少心機去製作，可惜未有一鳴驚人。
E:「我o地好緊張碟內所有聲，但計唱就係最差一隻。」
J:「我o地拎住呢隻碟敲過好多間唱片公司門都冇人理，仲受過不少說話同臉色。事隔多年，撞返當年曾經拒絕過我o地o既唱片高層。面口同語言完全唔同哂，又話好耐冇見，又話仲記得當年點點點，好現實。」
《Swing》慢半年 - Snowman出完碟，市場上零反應， 轉投英皇唱片的musicplus，以Swing重新出發。
E:「時至今時今日都覺得呢隻碟做得最有型，聽番〈Shut
up〉、〈半張飛〉、〈自得其樂〉，當時市場上其實冇乜呢種聲，對當時樂壇好有impact。首〈1984〉，當年plug時反應一般，直至半年後，大家先談論Swing有首歌好正喎，我o地條命就係咁。」
J:「我甚至覺得呢張碟對時下o既樂隊有正面影響，例如當中的big beat及〈自得其樂〉的半Bossa Nova。」
《On Fire》著火了 - 吃力不討好，出過兩張碟市場都冇迴響，Swing要發火!
J:「對行家o黎講，呢隻碟好正，好似基仔(方大同御用bass手)咁，就因為呢隻碟而鍾意我o地，當中啟發到佢點樣成為一個bass
player，呢樣o野最令我感到安慰。」
E:「我反而最唔鍾意呢隻碟，唔係因為o的歌，而係作為大碟，佢乜o野都有o的，欠一份精神，好散。就好似食buffet咁，仲要係冇主題o既buffet。」
《For Sale》賣身去 - 與其等市場放棄自己，不如自己先放棄市場，做一張不理會市場，純自己喜歡的專輯。
E:「碟內o既歌我o地都好滿意，因為成隻碟都係玩big band，亦係一張真正做出Swing style的碟。」
J:「全碟用o左好多管弦樂，又吹埋小號，但當時我o地兩個已經好唔妥大家，正值冷戰期，所以隻碟叫《For
Sale》，整個組合好似賣身咁拎出o黎賣，可惜都冇人要。」
《Swing Swang Swung》抄歌有理 - Swing o既創作經常被指偏門，又指不夠大路欠主流元素。 於是Jerald決定做一個小實驗:抄歌!
J:「〈小流星〉係我專登抄陳輝陽的〈終身美麗〉。既然你話我創作唔到Hit song，我就向當年最hit o既一首歌抄橋。同埋我想睇下跟到咁足，會唔會有人踢爆呢?結果，係冇人理!!實驗證明，我o地真係冇乜新聞價值，原創冇人理，抄又冇人理，咁我當年決定走真係好o岩。」