Swing拆夥快樂
得知Swing將舉行拆夥演唱會《Swing後會無期告別演唱會2011》的一刻，好想大聲高唱他們的舊作《大大公司》:「又到這 /關門的時候/ 清場的時候/ 拉閘的時候/ 願各位/ 今日都玩夠」。雖則他們說得上是香港樂壇史上離合最多的男子組合，更重申Swing今後絕不以任何姿態再現江湖，Jerald更笑說「如果再復合，觀眾真係會嗌回水o架喇」，但這次分離，二人不知幾開心，臉上絕無半點不捨，反而愈講愈興奮。
從前身Snowman到今日的Swing，這個二人男子組前前後後不知幾次解散再重組，據兩位當時人Jerald和Eric所講，今次解體確確實實絕不翻撻，皆因他們已圓了個人的目標， 而最重要是Jerald要返加拿大做廿四孝阿爸及老公。
賞味有期限
拆夥看似傷感，但今次Swing永別樂壇，絕非鬧不和，真相是 這個「決定」早在09年決定重組那一刻已經萌芽。
E:主要原因是Jerald要返加拿大照顧屋企，再唔走，佢老婆會撇佢。
J:照顧屋企的確係主因，但其實09年再group埋一齊時，大家已經講明出多一兩張碟，再搞個大型演唱會後，就會完結Swing這件事。
E:我覺得Swing是有有效日期的，當初我同佢決定重組，純粹覺得彼此還有一些音樂上的搞作可以嘗試，大家相隔7年猾合作，應該有新火花。
J:之後我o地就製作了《武當》這張由唱法、編曲、監製到演繹都可以代表到Swing的專輯，覺得無憾喇!叫做圓o左件心事。
E:加上又開o左紅館演唱會，算係圓滿句號，連帶幕前的Eric Kwok都會引退。(U:真的嗎?)可能，但只是送別幕前那個不負責任的Eric Kwok，幕後那個依然會存在。