就當我已玩夠 Swing
○九年才復合的Swing，又告拆夥了，這次以十一月下旬舉行的演唱會作結尾，show名絕得不能絕，叫《Swing後會無期告別演唱會》，彷彿一切再沒轉彎餘地,著大家唔使旨意香港樂壇將來再有Swing出現。「係真o架!唔係gimmick(綽頭)o黎o架!」Jerald陳哲廬認真地向我重複了六次。「佢(Jerald)個囡已經廿二個月大，佢真係諗住同太太移民返加拿大湊囡，所以係真o架!」Eric郭偉亮補充，「我o地上次○二年拆夥時，冇好好o地去say goodbye，我o地唔想咁唔開心，依家圓圓滿滿咁搞個farewell show，好似代表o左我o地係有expiration date(有效日期),而唔係永遠都會o係度，我o地反而覺得好有型!你話o勒,有幾何有藝人會好正式咁同大家講唔玩，仲要係永遠咁離開呢個娛樂圈呢?」
喂，大佬，呢個圈no promise，no guarantee(沒有承諾和保證)呀!Eric恍然大悟:「咁又係，你睇陳冠希(艷照事件)之後都仲有plug歌......」頓了頓，他又說:「不過我o地同佢唔同呀嘛!」Jerald即在旁附和:「佢(陳冠希)afford(承受)得起，我o地afford唔起呀嘛!」大概，這兩位○一年還在唱著〈就當我未玩夠〉的仁兄，沒想過十年後的今天，會因為一個廿二個月大的BB囡，讓他們覺得在樂壇已經玩夠。
冇癮
Eric和Jerald認識於九七年。「我o地有個uncle o係呢行做唱片公司高層，佢識我o地屋企人，當時想搞一個組合，咁就介紹o左我o地認識。」Eric說。
Jerald接著補充:「個組合本來仲有陳子聰，但o個陣子聰o係澳洲唔得閒，結果我o地冇等佢，就start o左Snowman呢個組合，等o左一年，九九年十一月出o左一張碟，我o地就簽o左英皇，改名做Swing。我仲好記得，第一次見到Eric，覺得呢個人好大隻，好似玩健身，body builder咁個喎!」
在旁的Eric即忍不住送他一句:「黐線!」然後跟我數Jerald:「佢好嘈，講o野好大聲，佢好多o野講o架!我最初都懷疑呢個組合得唔得，因為我同佢o既性格同鍾意o既o野都完全唔同，後來開始做音樂，先發現佢有料到,o的chemistry(化學作用)click得好好!」
既然大家click到，何以○二年要解體呢?Eric解釋:「其實Jerald一開始已經冇諗住留o係香港，做完Snowman，佢已經話要走;後來簽埋英皇做完Swing第一隻碟，佢已經覺得算啦!我留佢，佢又想走，大家各持己見，知道拗唔到落去，就唔到對方o的乜，大家都冇癮，○二年我o地臨拆夥之前，已經有好一段時間冇o野講，佢唔想做，真係冇得再逼!咁咪散囉!」
「我戇居囉!」Jerald在旁插嘴。「o個陣我係有諗過娛樂圈係點，但我戇居地以為我可以改變玩法，覺得自己可以控制到唔係咁玩，覺得有o的o野應該唔會發生o係我身上......呢o的咪stupid囉!」