忍受
Jerald不諱言，從入行到Swing○二年第一次拆夥的日子，他過得很艱苦。「o個陣我有好多o野想證明，擺好多時間去做碟同做宣傳，一年要出兩隻碟，又要做好多Jingle，好多o野做，但係出到o黎好似冇乜人知咁，連我最親o既親戚、朋友，一直都唔覺我o地做過o的乜，唔知我o地出o左碟，更加留意唔到我o地做過好多訪問——o的訪問做完之後，一係冇出街，一係o的版位細到根本睇唔到!我好唔開心、好冇癮，好似得個做字咁!既然做幕前乜都幫唔到我，咁我不如揀第二條路行啦!我本來會幫個uncle新開o既公司做project manager，不過最後唔夠水喉，公司開唔成，咁我咪做番幕後，幫人作歌囉。」
然而，他說的那幾年工作這麼多，就算賺不到名，照計也應該賺到利吧!「賺唔到喎!我係一個窮人!我依家收入都唔穩定，但起碼有，叫做好o的!但我九七至○四年o個七年o黎,我o偽錢方面都幾頭痛!好彩我由九七年至○○年，都係住o係個Uncle一個物業度，佢幫我畀o左一年租，雖然之後我都要畀番佢，但當時唔使交租，我已經暫時唔需要為交租而煩;到○○至○二年，我就同我依家o既太太，租o左個單位住埋一齊;然後好好彩，我o係加拿大o既屋企人，讓o左香港一個單位畀我o地住到依家。如果我○二年之後仲要交租，我唔會留o係香港咁耐，老早就走o左!以我o既收入，我根本suffer(忍受)唔到!」
沉迷
至於Eric，○二年沒有了Swing後，他繼續幹自己喜歡又享受的作曲和音樂工作，每年約出產三十首左右的作品，間中又推出自己的個人Demo碟。○六年，為陳奕迅寫的一首〈夕陽無限好〉，更為他囊括了全港的音樂大獎，成為了他的事業高峰。不過，直到○七年，他卻失足跌進另一個「世界」的深淵，幾乎破壞了所有本來順暢的幕後工作生活!
「○七年，謝霆鋒叫埋我一齊玩隻online game，我都唔知會咁大鑊!連續兩、三年，我玩到日與夜都唔知，試過有三日唔沖涼唔"目訓"覺唔食o野,當時我好多鬚根、暴瘦，個人癡癡呆呆咁!之前o既所有生活完全停頓晒，完全係lost o左!直情係好似o的毒友咁，戒唔甩!
「玩呢個game真係要好有自律o既人先玩得，但我個人冇乜自律性，我o係屋企做音樂，同打game都係同一部電腦、同一個位，好容易就係咁玩落去!我o個段時間，我連自己最鍾意o既音樂o既火都冇埋，我一年只係作o左七至八首歌，好彩有首〈囍帖街〉，都叫做有o的版稅收入頂住!不過我後尾都愈o黎愈驚，覺得好唔對路，真係要離開呢個網上世界，結果o係○九年，Jerald打畀我，話想重組Swing，可以話救番我出o黎現實世界!」