死唔斷氣 Swing
不是我立壞心腸，難聽點說，總是覺得Swing「死唔斷氣」。今個月尾，Swing舉行「後會無期告別演唱會」，話係正式解散，朋友、同事的第一個反應:「唔係散o左啦咩?」、「好耐之前已經話去加拿大啦!」、「又復合?」本能反應，記者劈頭就問:「今次真係解散?」二人聞言大笑好一陣子，郭偉亮(Eric)笑著說:「因為我講o野成日冇句真呀嘛?今次真o既!堅o架啦!」接著是陳哲廬(Jerald):「唔關你事o既，係我o既錯，今次真o架啦，ok?」看來，今次應該......死得去。
走硬
Swing狼來了的故事劇情是:00年組成，02年解散，09年重組，今年又宣佈正式解散。「今次係堅o架,係真o架!」Jerald肯定地說，接著是Eric，「佢老婆等o左佢好耐啦，再唔走就離婚，所以走硬呢鋪!」「咁又冇講到呢一句......即係如果再唔走，就feel到我o既婚姻會有一個好大o既危機。」「有二奶就有二奶啦，關走唔走咩事?我話o既，哈哈哈。」
你一言、我一語。Jerald說離開香港，大部分原因是為了女兒陳靖曦，「第一，o係香港養個細路仔要四百萬，我冇呀，第二，香港壓力好大，for個細路仔，尤其是讀書，個書包仲重過個人、咩都講成績，我o地唔想個女o係呢個環境長大。」Eric亦說Jerald有了女兒後，變了很多，「佢生完個女咪體會到以前好多所謂大問題，其實都係好無聊，而家所有o野都以個女行先，佢變o左唔係以佢自己為中心，係以佢個女為中心，學識做一個睇化o的o既人。」
其實他們於09年重組時，已決定出三張唱片，開一個賣飛的演唱會，之後「分手」，Jerald說:「用Swing去結束我o係香港15年o既生涯，我覺得係一個好好o既ending。」Eric坦言還未有不捨的感覺，但在演唱會上喊就肯定，「今次係最後一次，又有佢o係度，我諗喊就應該會，但幾多次真係唔知，最好唔好咁多次啦，好"火羅"o架嘛。(Jerald:同埋好悶呀!)」