他自嘲做甚麼都半桶水，在香港每逢數學考試幾乎包尾，直至發現世上存在靠作、曲編曲可以搵食這條路，人生忽然很有目標。「音樂我諗我全部都係天份，冇後天。個人比較懶，又冇恆心，所有o野都係自己學。點樣作曲、編曲，studio o的器材點用、點樣programming，全部都係刨說明書學!o個時未有YouTube，亦冇人教。樂理我都唔識，去到大學先死讀番兩個course學番。其實好o徙錢，讀完都冇用!o依家都唔記得哂!樂理對作曲係一個枷鎖，因為佢好多o野話唔得，我覺得音樂唔係咁樣。」
他寫出〈幸福摩天輪〉、〈夕陽無限好〉、〈囍帖街〉、〈楊千嬅〉等幾乎每位香港人都能哼幾句的歌，大家明白樂理何價。「不嬲都覺得自己o的歌好commercial，我唔覺得要考慮o的咩，朝住自己想做o既o野就做，咁先有自己風格。」
Michael Jackson、Madonna、譚詠麟、張國榮、林子祥，還有他最著迷的The Beatles，才是他的樂理。「寫流行音樂o既人個個都公認Beatles係流行曲聖經o黎，pop o野你冇聽過Beatles其實就係你o既損失!」
做了四十年人，寫歌幾百隻，沒有hit的仍是大多數。「成日都有呢o的事發生o架喎，多數都係覺得呢隻歌會hit但最後冇hit，咁但係有時候覺得會hit就真係hit o左。我最估到o個次係〈夕陽無限好〉，o個次Eason休息o左一年，復出o個下好緊要，咁我就作o左呢首歌，話佢知呢首歌應該ok，咁個成績都唔錯。〈幸福摩天輪〉就真係估唔到咁爆;〈囍帖街〉都估到會爆，但估唔到係咁爆!
二人火花
回港發展，在爸爸穿針引線下與同是番書仔的陳哲廬(Jerald)組成Snowman，本來只單人匹馬做幕後的Eric，和一個不相識的人搞共同創作，他認為事情行不通。「我覺得佢個人好煩，點解佢可能咁多o野講呀?呢個人性格同我好唔夾!總之就好煩，同埋好誇張!但佢一埋個琴開始彈o野，我就諗到o野，同佢一路咁jam，火花開始o黎，就停唔到!之前覺得佢好煩呀、我o地唔會夾呀......就冇哂!佢係一個好好o既工作夥伴，私底下都好friend，雖然唔會一齊出街食飯睇戲，但有好多共同嗜好，有o的咩事佢都會打電話問我。大家o既幽默都係差唔多，同一個channel，我諗同大家都係外國返o黎有關。如果有睇過我o地紅館演唱會，成個騷全部都係爆肚，你會睇得到係好夾，爆得好自然。」