可惜香港樂壇風氣令Jerald感十分氣餒，加上他不喜歡香港教育制度，為了她女兒將來，他又回到加拿大。「拆夥之前都冷戰o左一排，冇傾偈呀直情係，因為都冇乜意思，佢都好唔想做。」
拍檔走了，Eric Kwok並不孤獨。「圈中最好朋友我諗係阿臣(陳奕迅)啦，識得佢都算最耐，同埋最o岩傾，梁漢文、劉浩龍都係好熟。男人唔會講心事，玩多頭、睇戲多、食飯多。不過最好朋友唔係佢o地，係小學識到o依家o個o的。o個陣時係寫信，錄卡式帶、MD，好似DJ咁，最好笑就係我讀大學時我o的朋友全部過哂o黎讀書。到入o左娛樂圈仲keep到好大班人o架，有o的幼稚園三歲識到o依家，差唔多四十年所以難得!」
二人家庭
寫歌可以一個人，唱歌表演可以一個人，自青春期開始，他肯定生活不能老是一個人。去到番邦，難免跟洋妞調調情，談談愛。「有o架!都發展o左個零兩個禮拜o架!o個時好細個，佢好好身材，我記得!但係唔知點解冇o左件事，好似係我唔鍾意佢......十四、五歲，我諗你知細個時愛情好緊要，有少少唔係好o岩就冇繼續，但佢就好主動，唔知點解!之後o的女朋友都係中國人，真係冇乜外國女朋友。」
人人都知，陪他生活還有一個人，叫葉佩雯。「佢之前都好辛苦o既，細細個出道o既時候，唔係人o既生活o架，我識佢時佢情緒都波動得幾緊要，好彩識o左我之後就一路幫佢療傷，o依家就嘆番夠本，係時候出o黎玩o下，我成日叫佢出o黎做o野，係佢唔出o黎咋嘛，哈哈!」
拍拖十幾年，都認定了大家是終身伴侶，難得他還努力製造驚喜婚禮，成為第一對在紅館台上結婚的夫婦。「其實結婚之前兩、三年開始諗，我覺得應該畀番個名份佢，佢都真係唔知!戒指o係求婚之前一年已經買o左，要收埋佢，爭o的畀佢搵到o架!紅館o個次佢真係surprise，之後佢都消化o左成個幾兩個禮拜先接受到o係台上嫁o左!好彩後尾有擺番酒就圓滿o的。」